FN-imut maalaarut

Suka: Naalagaaffiit Peqatigiivinut maalaaruteqarnissaq tunngavissaqanngitsoq

Tusagassiortunut katersortitinermi Nunanut Allanut Naalakkersuisup, Vittus Qujaukitsoq Naalagaaffit Peqatigiinnut maalaaruteqarnermini peqateqarsimanngitsoq naqissuserpaa.

Nunanut Allanut Naalakkersuisoq Suka K. Frederiksen

- Naalakkersuisut Naalagaaffiit Peqatigiivinut maalaarummik utertitsivoq, tunngavissaqanngitsumik maalaarummik nassiussisimaneq utertitsinermut tunngavilersuutigineqarpoq.

Nunanut Allanut Naalakkersuisoq, Suka K. Frederiksen, tusagassiuutinut katersortitsinermini pingasunngormat ilaatigut taama oqarpoq.

Atuaruk: Suka Frederiksen FN-mut maalaarut pillugu tusagassiortunik katersortitsivoq

Paasissutissat piviusunik amingaatillit

Nunanut Allanut Naalakkersuisuusimasoq, Vittus Qujaukitsoq, qaammatip siuliani Naalakkersuisunit tunuartoq danskit naalakkersuisuisui Naalagaaffiit Peqatigiit suliniaqatigiiffiannut assigiinngitsunut pingasunut maalaaruteqarpoq, taakku inuit pisinnaatitaaffiinik unioqqutitsinernik misissuisartuupput.

Maannali maalaarutit Naalakkersuisunit utertinneqarput.

Tusagassiortunik katersortitsinermi Suka K. Frederiksenip oqaatigaa, Naalakkersuisut paasissutissanik piviusunik Naalagaaffiit Peqatigiinnut maalaaruteqarnissamut amingaateqartut.

Atuaruk: Naalakkersuisut maalaarut utertikkaat

- Maalaaruteqarnissaq Naalakkersuisunit aamma akuersissutigineqarsimanngilaq. Nunanut allanut – sillimaniarnermulli ataatsimiititaliaq ataatsimeeqatigisimavara, taakkuli oqaatigaat maalaaruteqarnissamut ataatsimiititaliaq akuersissuteqarsimanngitsoq.

- Suliaq alianarpoq, Nunattali tusaamaneqarneranut iluaqutaanngilluinnartoq. Maalaarutilli Naalagaaffiit Peqatigiinnut nassiunneranni, Naalakkersuisut suleriaasiat malinneqarsimanngillat. Tamanna pissutigalugu maalaarutit utertippavut, Suka K. Frederiksen oqarpoq.

Powered by Labrador CMS