suiaqatigiit katittarnerat
Suiaqatigiit oqaluffimmi katissinnaanngungajalerput
Nunatsinni ilageeqarnermut inatsit allanngortinniarneqalerpoq suiaqatigiit oqaluffimmi katissinnaalernerannik kinguneqartussaq
Nunatsinni biskoppi Sofie Petersen oqaluffimmi ritualissanik sanavoq suiaqatigiit katitinneqarneranni atorneqartartussanik. Aamma suiaasutsimut aalajangigaanngitsumik katissimanermut uppernarsaammik sanasoqarpoq.
Inuit Ataqatigiit sinnerlugit Inatsisartuni ilaasortaq Naaja Nathanielsen paragraf 37 naapertorlugu apeqquteqarpoq suiaqatigiit oqaluffimmi katissinnaalernissaannut suliaq sumut killinnersoq paasiniarlugu.
Ritualit nutaat
Naalakkersuisut siulittaasuat Aleqa Hammond Siumumeersoq akissummini allappoq tamanna Inatsisartut upernaamut katersorneranni martsip 18-at aallartittussami oqallisigissagaat
- Naalakkersuisut suiaqatigiit katittarnerannut malittarisassat allanngortinneqarnerannut missingiummut tusarniaaneq tiguaat. Danskit naalakkersuisui ilisimatitsipput pineqartumi pappiaqqat Naalakkersuisunut inatsisartut upernaakkut 2014-mi katersornissaanni saqqummiunneqartussanngorlugit nassiunneqarumaartut, Aleqa Hammond Naaja Nathanielsenimut akissummini allappoq.
Oqaluffimmi pisut ritualit malillugit pisarput palasillu oqaasissaasa ilaat siumut aalajangersoriigaasarput. Biskop Sofie Petersen aamma ritualissamik suliaqarpoq suiaqatigiit oqaluffimmi katinneranni atorneqartartussanik.
Suiaqatigiit kommunip allaffiani katissinnaapput oqaluffimmili katissinnaalissappata ilageeqarnermut inatsit allanngortinneqaqqaartussaavoq. Inatsisip allanngortinneqarnissaa pillugu inatsisartut noqqaassuteqartussaapput. Ilageeqarnermulli inatsit Folketingip oqartussaaffigimmagu allannguineq Folketingimi naammassineqartussaavoq.