Suiaassuseqatigiit pillugit oqaaseqartoqareernerani Savalimmiuni qinerseqqittoqariaannaasoq
Savalimmiuni partiit minnerit ilaat Midterparti savalimmiuni naalakkersuisoqatigiinnit anivoq. Partiip naalakkersuisuni ilaasortaatitaa marlunngornermi tunuartitaanerata kingorna taama pisoqarpoq. Tamanna qinerseqqinnermik kinguneqaratarsinnaavoq.
Midterpartiet tusagassiorfinnut naatsumik nalunaaruteqarlutik ilisimatitsipput partiit savalimmiuni naalakkersuisuinit tunuarniuteqartut, lagmandip kulturimut aamma nunanut allanut tunngasunut ilaasortaatitaasoq soraarsissimammagu.
Tamanna isumaqarpoq lagtingimut qinersisoqaqqeriaannaasoq.
Ulloq aallarnerlugu lagtingimi kulturimut nunanullu allanut tunngasunut naalakkersuisuutitaasumut Jenis av Ranamut tatiginnikkunnaarnermik taasititsisoqartussaavoq.
Ataatsimiinnerup aallartinngitsiarnerani lagmand Bárður á Steig Nielsen nalunaaruteqarpoq Jenis av Rana tunuartissimallugu tunngavilersuutigineqarluni meeqqap inunngornerani anaanaasup kinguliaa oqaluffimmi meeqqap allattorsimaffianut ilanngunnissaanut peqataajumannginnera.
Jenis av Rana qinersinissaq sioqqullugu suiaaqatiminoortumik ministeriuneqarusunnani aamma oqaaseqarsimavoq.
Amerlanerussuteqarunnaartut
Naalakkersuisuutitaqartut Sambandspartiet, Folkeflokken aamma Midterpartiet lagtingimi ilaasortat 33-iusunit 17-inik ilaasortaatitaqarput.
Naalakkersuisuutitaqartulli maanna lagtingimi 15-inik ilaasortaatitaqalerput.
Selvstyrepartiip naalakkersuisuutitaqartunut tapersersuisuulluni nalunaarutigisimavaa, lagtingimili ataasiinnarmik ilaasortaatitaqaramik naalakkersuisunut tapertaagaluarpata, naalakkersuisuutitaqartut suli ikinnerussuteqarput.
Lagmandip partiit allat naalakkersuisoqataanissaannut qaaqqusinnaagaluarpai, periarfissalli amerlagisassanngillat.
Javnaðarflokkurin/Socialdemokraatiusut oqareerput Folkeflokkenimik naalakkersuisoqateqarusugatik.
Løsrivelsesparti Tjóðveldi Sambandspartimik suleqateqarnavianngillat, naalagaaffeqatigiinnermik akuersaartuunerat pissutigalugu.
Framsókn itigartitsisoq
Partiit minnerit ilaat, Framsókn, savalimmiormiut inatsisartuineeqqilerpoq marlunnik ilaasortaatitaqarluni. Taakkua Midterpartiinik taarsiisinnaagaluarput, Framsóknili itigartitsivoq.
- Taamaasiornianngilagut. Periarfissat nungulluinnarput, qinerseqqinnissarlu qaninneruvoq, siulittaasoq Ruth Vang oqarpoq.
Lagmandi oqaaseqartinniarlugu iluatsinngitsoorpoq.