Suiaaqatigiit katissinnaanngungajalernerat IA-mit nuannaarutigineqarpoq

(Allaaserineqartoq Justus Hansenimik imaqarluni nutarterneqarpoq nalunaaqutaq 11.06)

Angut anguteqatiminut katissinnaanngungajalerpoq.

Assinganik arnaq arnaqatiminut katissinnaanngungajalerpoq.

Suiaaqatigiit katissinnaalernissaat pillugu Inatsisartuni oqallisigineqassaaq.

- Inuit Ataqatigiinniit siunnersuutip kiisami naammassingajalernera tamatumalu tapersersorneqarluarnera nuannaarutigivarput. Inuit Ataqatigiinniit suiaaqatigiit aappariittut allatuulli katissinnaanngornissaannut inatsit ukiuni tallimani sorsuutigisimavarput. Inuit Ataqatigiinniit ukiorpassuanngortuni Folketingimi suliaqarnitsinni inatsisissamut siunnersuutip Folketingimiit Inatsisartunut ingerlateqqinneqarnissaa sulissutigisarsimavarput, Inatsisartuni ilaqutariinnermut Peqqissutsimullu ataatsimiititaliami ilaasortaq, Aaja Chemnitz Larsen allappoq.

Suiaaqatigiit katissinnaanngornissaannut siunnersuut IA-p Demokratillu naalakkersuisooqatigiinnerisa nalaani saqqummiunneqarpoq. Inatsisartuni ilaasortaasup Justus Hansenip Demokraatineersup siunnersuutigaa 2010-mi, tamanna Sermitsiaq.AG-mut erseqqissaassutigaa.

Siunnersuut Naalakkersuisunit siunnersuutigineqarpoq.

Taamanikkut IA-p Folketingimi ilaasortaatitaata Sara Olsvigip tamanna kingullermik septembarimi 2013-imi qaqippaa, tassanilu Danmarkimi naalakkersuisut suiaaqatigiit katissinnaanngornissaannut siunnersuutip Folketingimiit nassiunneqarnissaanut tuavisaarneqarput.

Inatsisip allannguisoqarnissaa
Inuit Ataqatigiinniit Meeqqanut Inatsisip 1963-meersup sulilu nunatsinni atuuttup, suiaaqatigiit katissinnaanngornissaannut siunnersuummut iluatsillugu suliarineqannginnera partiimit uggorineqarpoq. Tassa inatsit taanna ukiunik 50-inik sinneqartunik pisoqaassuseqarpoq IA-llu isumaat naapertorlugu nataanngililluni ullumikkut ilaqutareeriaatsinut tulluarunnaarsimalluni.

- Meeqqanut Inatsisip nutarterneqannginneratigut suiaaqatigiit akuerisaasumik angajoqqaajoqatigiissinnaannginnerat Inuit Ataqatigiinniit uggorivarput, tassa inatsit maanna atuuttoq naapertorlugu angajoqaajusup aappaata aatsaat meeraq meeravissiartaarippagu tamanna pisinnaanngortarmat. Aappariit taakkua suiaaqatigiinnatik aappariittulli ilaqutariinnik pilersitsisinnaannginnerat assigiinngisitsineruvoq, IA-mit Aaja Chemnitz Larsen tusagassiutinut nalunaarummi allappoq.

Meeqqanut Inatsisip nutartikkap piaarnerpaamik atuutilernissaanut saqqummiussinissaq salliuteqqullugu Inuit Ataqatigiit Naalakkersuisut inassuteqarfigaat.