Sugisaq ukiuni 19-ini siulittaasumut inuulluaqqusivoq
Sugisaq nutaanik siulersuisoqalerpoq. Ilaasortat nutaat pingasut qinigaapput, Esekias Therkelsen, ukiuni 19-ini siulittaasuusimasoq tunuartoq.
Sugisap siulersuisui nutaanik ilaasortaqalerput. Inuit isumaliortaatsimikkut napparsimasut innarluuteqartullu sugisaasa peqatigiiffiat tusagassiuutinut nalunaarummi taama ilisimatitsivoq.
Tamanna weekendimi pivoq, tassani peqatigiiffimmi ilaasortat qulit sinneqalaartut ileqquusumik ataatsimeersuarnermut takkupput. Tassani ilaasortat pingasut qinerneqarput: Cecilie Marie Hardenberg, Suusi Ostermann aamma Malu Ostermann.
Cecilie Marie Hardenberg siulersuisuni siulittaasunngorpoq, taamaalillunilu Esekias Therkelsen, ukiuni 19-ini siulittaasooreerluni soraarninngortoq kingoraarpaa. Siulittaasunngortoq siulersuisuni ilaasortanut nutaanut neriuuteqarluarluni oqarpoq.
- Aappaa peqatigiiffinnik sulinissaminut misilittagaqareermat, taavalu aappaa aamma isumaliortaatsikkut nappaatit pillugit ilisimasaqareermat, allannguinissamullu piumassuseqartorujussuulluni.
Sugisanut atukkat pitsanngorsassapput
Peqatigiiffiup siullermik inuit isumaliortaatsimikkut napparsimasut innarluuteqartullu sugisaasa oqinnerusumik inuuneqalernissaat sulissutiginiarlugu, Cecilie Marie Hardenberg ilisimatitsivoq – aamma ikorfartoqatigiissinnaanermut periarfissanik ujartuissapput.
Sugisap 2023-2027-mut periusissatut pilersaarutaa malillugu oqalugiarpoq.
Taanna itisiliivoq:
- Sugisaq nukittorsarlugu nunatsinni siuarsarnissaa immikkoortortaqarfiit assigiinngitsut pilersinnissaannut taavalu aamma suliniut una ingerlaannassaaq Sugisamit napparsimasut sugisaasullu tapersersorneqarsinnaanissaat taavalu sorsuutigalugu iluamik katsorsartissinnaanissaq periarfissaq taanna, Cecilie Marie Hardenberg oqarpoq.