Strasbourgimi toqoraasoq aallaaneqarluni toqunneqarpoq

Cherif Chekatt, marlunngormat saassussinermini toqutsisutut pasisaq, toqutaavoq.

Frankrigimi nunami namminermi ministeri, Christophe Castaner, nutaarsiassaqartitsivimmut Reutersimut uppernarsaavoq.

Ministerip oqarneratut, politiit pingasut, angummik marlunngormat saassussisutut pasisatut ilisarisaminnik, aqqusinermi naammattoorsisimapput.

Strasbourgimi saassussineq ima ingerlavoq

Cherif Chekattip Strasbourgimi juullimut niuffatsitsisoqarnerani marlunngornerup unnukkuani aallaasersorluni saassussinerata kingorna inuit pingasut toqutaapput, 13-illu ikiligaallutik. Pasisaq politiinit sisamanngornermi unnukkut aallaaneqarluni toqutaavoq.

Saassussineq pillugu uku nalunngilagut:

* Sumiiffiup Place Kléberip ungasinngisaani, juullimut niuffatsitsineq Christkindelsmärik ingerlanneqarnerata nalaani angut marlunngornermi unnukkut nalunaaqutaq 19:50 aallaasersorpoq.

* Kingorna aqqusineeqqakkut Rue des Orfèvresikkut, niuertarfinnik neriniartarfinnillu ulikkaartukkoorluni qimaavoq. Tassani aallaasersoqqippoq, sumiiffiullu ungasinngisaaniittumi Rue des Grandes-Arcadesimi eqqaqqilluni, ikaartarfikkullu Pont du Corbeauikkut qimaalluni.

* Aallaasersorneq minutsinik qulinik sivisussuseqartoq aqqusinerni arlalinni ingerlanneqarpoq. Pisup ingerlanerani takunnittut arlallit pinerliisoq "Allahu Akbar"-mik (Guuti angeqaaq, aaqq.). suaartartoq tusaavaat. Takunnittut allat oqaluttuarput saassussisoq aamma inunnut allanut savilersorluni saassussiniarsimasoq.

* Pinerliisup qimaanermini sakkutuut naammattoorpai, naapinnermilu aallaammik eqqartoqarpoq. Aallaasersornermi sakkutooq ataaseq assammigut aallaaneqarpoq, pinerliisorlu talimigut aallaaneqarluni.

* Takornariaq Thailandimiu 45-nik ukiulik neriniartarfiup eqqaaniitsilluni niaqqumigut aallaaneqarpoq, toqullunilu.

* Pinerliisoq taxarluni illoqarfiup ilaanut Neudorfip Place de l'Étoilellu nalaanut qimaavoq.

* Taxartitsisoq kingorna oqaluttuarpoq pinerliisoq oqarataarsimasoq toqutsisimalluni angerlarsimaffimminilu igeriuttakkamik qaartartuuteqarluni.

* Sillimaniarnermi sakkutuut 350-it qulimiguullillu arlallit pingasunngornerup unnuaani pinerliisimasumik ujaasitinneqarput. Ujaasinermi pingasunngornermi sakkutuut 500-nik ilaneqarput.

* Pinerliisimasoq ulluni marlunni ujarneqareersorlu, pinerliisoq Neudorfimi politiinit sisamanngornermi unnukkut aallaaneqarpoq toqullunilu.

* Pinerliisoq quersuarmi Plaine-des-Bouchersimi, Meinaumiittumi, illoqarfiup ilaata Neudorfip ungasinngisaaniittumi marlunngormalli unnukkut toqqoqqasimassangatinneqarpoq.

Paasisat: The Guardian, France 24, France Info.

Castanerip oqarnera naapertorlugu, politiit angummik tigusarinninniarnerminni angut aallaasimavaat.

- Politiit aallaammik eqqapallapput angullu nikissinnaajunnaartillugu, oqarpoq.

Najukkami aviisi Les Dèrnieres Nouvelles d'Alsace malillugu, Chekatt politiinit aallaaneqarnissani sioqqullugu, sisamanngornermi unnukkut politiit biiliinut aallaammik eqqarsimavoq.

Aviisip nutaarsiassiinera naapertorlugu Chekatt Rue du Lazaretimi, Neudorfimiittumi, illoqarfiup Strasbourgip qeqqata kujasissuaniittumi aallaaneqarpoq.

Pinerliisup aallaaneqarnerani sakkutuut BST-it peqatapput.

Chekatt aallaaseqarlunilu saveqarpoq. Taanna Strasbourgimi marlunngormat juullimut niuffatsitsinermi inunnik pingasunik toqutsisimasutut inunnillu 13-inik ikiliisimasutut pasineqarpoq.

Nutaarsiassaqartitsivik France Info malillugu, pasisaq quersuarmi Plaine-des-Bouchersimi, Meinaumiittumi, illoqarfiup ilaata Neudorfip ungasinngisaaniittumi marlunngormalli unnukkut toqqoqqalersimavoq.

Toqutsisutut pasisap ujaarineqarnerani politiit 700-t sinneqartut ujaaseqataapput.

Neudorfimi aqquserngit arlallit sisamanngornermi politiinit matuneqarput.

Illoqarfiup ilaani tassani, Cherif Chekatt taxanut ikilernermini politiinut marlunngormat unnukkut aallaasersorsimavoq.

Aallaasersornermi tassani politiinit aallaarsarineqarluni eqqorneqarsimassasoq, politiit ilimagaat.

Ilisimatitsissutit kingulliit malillugit, politiit ujaarinnillutik suliaqalersimasut, Nunamut namminermut ministeri, Christophe Castaner, franskit senatimi ilaasortaatitaannut sisamanngornermi ualikkut ilisimatitsivoq.

Strasbourgimi sisamanngornermi unnukkut aallaammik eqqarpaluttoqartoq tusaaneqarsinnaavoq, qulimiguulillu illoqarfik qulaallugu timmisoq takuneqarsinnaasimalluni. Kinguninngua nalunaarutigineqarpoq, Chekatt toqusimasoq.

Saassussinermi inuk ataaseq aallaaneqarnermi kingorna siniinnalersimasoq, toqutaasut pingajuattut sisamanngormat nalunaarutigineqarpoq.

Chekatt politiinit nalunnginneqareerpoq. Frankrigimi Tysklandimilu tillinniarsimasutut nakuusersimasutullu arlaleriarluni pineqaatissinneqartareersimavoq.

Strasbourg inuuvoq peroriartorlunilu.

Franskit politiivisa Cherif Chekattip angajoqqaavi qatanngutaalu angutit marluk tigummigallarpaat.

Qatanngutaalu angut pingajuat Algeriami aamma tigusarineqarsimasoq nalunaarutigineqarpoq.

Tyskit nutaarsiassaqartitsiviat dpa taama allappoq.

Cherif Chekatt, 29-nik ukiulik, Strasbourgimi marlunngornermi saassussisimasutut pasineqarpoq, tassani inuit pingasut toqutaapput inuillu arlallit ikilerneqarlutik.

Politiit kingorna anaanaa ataataalu, kiisalu qatanngutai angutit marluk tigusaraat.

Taakku saniatigut inuk, ilaqutaasuunngitsoq, politiinit tigusarineqarpoq. Strasbourgimi unnerluutiginnittussaatitaasoq dpa-mut ilisimatitsivoq.