Strasbourgimi juullimut niuffatsitsinermi aallaasersortoqarnerani marluk toqutaasut 14-illu ikilerneqartut
Pinerluttoq nassaariniarlugu franskit naalakkersuisuisa sakkutuut suliakkerpaat, Tysklandillu killeqarfiani nakkutilliineq annertusillugu
Toqutaasut ikilerneqarsimasullugu pillugit nalunaaqutaq 7:20 paasissutissiilluni nutarterneqarpoq.
Franskit naalakkersuisuisa Strasbourgimi sakkutuut atorlugit, marlunngornermi juullimut niuffatsitsinermut aallaasersortoq, marlunnik toqutsillunilu 14-inik ikiliisoq ujaaraat.
Franskit nunami namminermut ministeriat, Christophe Castaner, Strasbourgimi piaartumik tusagassiortunik katersortitsinermini pingasunngornerup unnuaani taama oqarpoq. Nutaarsiassaqartitsivik Reuters taama allaaserisaqarpoq.
Sumiiffinni ammaannartuniittuni inuillu ingerlaarfiginerusartagaanni illoqarfinni amerlanerni marlunngornerup unnuaaniit politiit amerlanerit angalaartinneqalissapput.
- Naalakkersuisut aalajangerput aarlerinartorsiornerup annertuutut nalilissallugu, taamatullut sillimaniarneq annerpaamut inississallugu, tamanna isumaqarpoq killeqarfinni ikaartut tamarmik nakkutilliivigineqassammata, Christophe Castaner oqarpoq.
Strasbourgimi aallaasersorneq pillugu uku ilisimareerpagut:
* Angut Strasbourgimi illoqarfiup qeqqani juullimut niuffatsitsinermi marlunngornermi unnukkut nalunaaqutaq arfineq-pingasut missaanni aallaammik eqqaavoq.
* Inuit marluk toqusimasut nalunaarutigineqarput. 14-it ikilerneqarsimapput, taakkunannga arfineq-pingasut ikilerujussuarsimallutik.
* Angut aallaasersortoq politiinit aallaammik igitsivigineqarsimavoq, maannamulli suli tigusarineqarani.
* Pasisaq 29-nik ukioqarpoq, piffissamilu sivitsortumi sillimaniarnermut navialisitsisinnaasutut pasineqarluni franskit politiivinit malinnaavigineqarsimalluni.
* Pasisaq immikkut nakkutigineqartutut allassimasuutigineqarpoq, ingasaassiniarsinnaasutut nalilerneqarsimalluni.
* Aallaasersorneq peqqarniisaarniarnertut paasiniaaffigineqarpoq.
Paasisat: Franskit nunami namminermi ministeriaqarfia, franskit politiivi, AFP, Reuters.
Franskit politiivisa angut 29-nik ukiulik ingasaassiniartunillu ilagisaqartartoq aallaasersorluni eqqaassisimasutut pasivaat. Taanna sivitsortumik politiinit nakkutigineqartareerpoq, franskillu oqartussaasuisa immikkut nakkutigisassatut allattorsimaffianni ilanngunneqarsimalluni.
Saassussineq marlunngornermi unnukkut nalunaaqutaq arfineq-pingasut missaanni pivoq, pisup kingornalu pinerliisoq politiillu akornanni aallaammik eqqaassisoqarluni. Pinerliisoq tassani ikilerneqarpoq, qimaasinnaasimallunili.
Strasbourgip borgmesteria, Roland Ries, franskit tv-qarfianut BFM-imut oqarpoq, juullimut niuffatsitsinermi ajutoortoqannginnissaannut atatillugu immikkoortortamut ungaluliiffimmut pinerliisoq isersinnaasimasoq. Tassanngaanniillu eqqarluni aallartissimasoq.
Saassussinermut suna tunuliaqutaanersoq franskit oqartussaasuisa suli qulakkiinngilaat.
Illoqarfimmi politiit sakkutuullu maanna amerlangaatsiartut, sumiiffimmi nutaarsiassaqartitsiviit nutaarsiassiipput.
Saassussereernerup kingorna niuffatsitsivimmit anisoqassanngitsoq oqartussaasunit akunnerpaalunni inassutigineqarpoq.
Inuillu tusintilikkaat anisinnaasimanngillat, politiit pinerliisumik suli tigusarineqanngitsumik malersuinerata nalaanni.
Europap Inatsisartoqarfia Strasbourgimiippoq, aallaasersortoqarneratalu kingunerisaanik EU-p inatsisartuinut ilaasortai, qallunaat arlallit tassani ilaallutik, Inatsisartoqarfimmit aneqquneqarsimanngillat.
Toqutaasut pingasuusut ikilerneqartullu aqqaneq-marluusut oqartussat siornatigut ilisimatitsissutigigaluarpaat.