Stop spild lokalt - Nuuk nerisassanik agguaassapput
Nammineq kajumissutsiminnik ikiuukkusuttut, neriniartarfiit nerisassaataannik atunngitsuukkanik, decembarip 23-ani ilaqutariinnut kisimiittunullu meeralinnut nerisassaqanngitsunut, agguaassapput.
Juullip eqqissinanera malunniukkiartorpoq, ilaqutariiaallu juullimi nerisassanik pitsaasunik piareersaalereerput. Ilaqutareeqarporli kisimiittunillu meeralinnik, nerisassanut akissaqanngitsunik.
Taamaammat Christina Busk Larsenip nammineq kajumissutsiminnik ikiuukkusuttut katersorsimavai, taakkulu Katuaq Hotel Hans Egedellu nerisassaataannik atunngitsuukkanik, ilaqutariinnut agguaassapput.
Katuami cafetuaq Hotel Hans Egedellu neriniartarfii maanna nalunaareerput nerisassanik tunniussissallutik.
- Katuaq isumaqatigiissusiorfigereerparput, taakku ullaap tungaani nerisassanik atunngitsuukkaminnik, qallersuutissanik iffianillu tunissavaatigut. Taassuma kingorna Hotel Hans Egedemut neqineq assigisaanillu aallissaagut, neqaateqarluarnerpummi taakku, Christina Busk Larsen oqarpoq.
Ikiorneqarnissamik kissaateqartoqarpoq
Rasmus Erichsen, Danmarkimi stop spild lokalt-imik (najugarisami nerisassanik eqqaanaveersaarta, aaqq.) ingerlataqartoq, facebookikkut Nuummiunik kajumissutsiminnik ikiuukkusuttunik ujartuivoq. Ingerlaqarneq Danmarkimi piffissap sivikitsup ingerlanerinnaani ingerlallualersimavoq, maannalu Rasmus Erichsen Nuummi assigusumik ingerlataqartoqarnissaanik ujartuilluni.
- Rasmus attaveqarfigaara, ullormilu tassani ataqatigiissaarisussatut piumallunga. Nammineerlunga igaassannik pilersaarusiortarpunga, nerisassallu ajortinnginnerini atorluarniartareerlugit, Christina Busk Larsen oqaluttuarpoq.
Ilaqutariit kisimiittullu meerartallit qulit missaanniittut Christinamut attaveqarsimapput. Taakku kissaatigaat nerisassanik pajutsinnissartik.
Nuummi aqagu anorersuarnissaanik aarlerisaarisoqarmat, Christina Busk Larsenip naatsorsuutigaa nerisassat biiliullugit pajuttorneqassasut.
- Soorunami aarlerilaarpunga, qujamasunnarporli kajumissutsiminnik ikiuukkusuttut amerlalaartut nalunaarsimammata. Kajumissutsiminnik ikiuuttussat nerisassat agguataassavaat, ilaqutariinnullu apuussussavagut, Christina Busk Larsen oqarpoq.
Nerisassat Katuamut Hotel Hans Egedemullu nalunaaqutaq pingasut missaanni aaneqassapput.
Pisiniarfiit nerisassanik eqqaanaveersaarnermik annertuumik suliniuteqareerput, taakkulu Christina Busk Larsenimut nalunaarsimapput naammattunik pisiassanik sinneqarnaviaratik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...