Stine Egede: Nalunaarsuiffeqarnikkut kommunip kiffartuussisarnera qulakkeerneqassaaq
Stine Egede qaammatini pingasuni borgmesteriunermini aningaasaqarnikkut unammilligassaqarneq, ingerlatsivinni pisortaqartoqannginnera coronalu pissutigalugit suliassaqarsimaqaaq.
Kommuni Kujallermi borgmesterinngorlaaq Stine Egede qaammatini siullerni pingasuni pissaanermik tigummiaqarnermini suliniutinik arlalinnik aallartitsisimavoq, ilaatigut innuttaasunik kiffartuussisarnerup pitsaanerulersinneqarnissaanik qulakkeerinnittussanik aamma meeqqat atuartut illoqarfinni anginerusuni atuartut angerlarsimaffiini najugaqartinneqarlutik atuariartortinneqartartut angerlarsimaffimmni ilinniagaqalernissamu pitsaanerusumik periarfissinneqarnissaat anguniarlugu. Borgmesteri qinersisoqarmalli politikkikkut suliniutit killiffii pillugit Sermitsiaq.AG-mut taamatut oqaluttuarpoq.
- Nalunaarsuiffimmik innuttaasut sullinneqarnissamik pisariaqartitsisut sullinneqarnissaat qulakkeerniarlugu pilersitsiniarluta suliaqarpugut. Inuit qanoq amerlatigisut naammagittaalliortarsimanersut naluara, Facebookili qiviaannaraanni suliassarpassuaqarluta takusinnaavarput. Pitsaanerusumik sullissisoqartarnissaa sukkanerusumillu sullissisoqartarnissaa qulakkiissavarput, Stine Egede oqarpoq.
Nunap kommuniani kujallermiittumi innuttaasut 6.400-t missaanniipput. Kommunip 2021-mut missingersuutaani takuneqarsinnaavoq, 2021-mi isumaginninnerinnarmut 246 millioner koruuninik atuisoqarnissaa kommunimit naatsorsuutigineqartoq. Innuttaasut eqqagassalerinermut pujoorfinnillu paaviaasarnermut 88 millioner koruuningajalluinnarnik akiitsoqarput.
Meeqqat atuartut aallartinneqartassanngitsut
Kommuni Kujallermi suleqatigiit IA-p Atassutillu isumaqatigiissutigisimavaat, meeqqat atuartut illoqarfinnut anginerusunut atuariartortinneqartartut ikilisinneqarnissaannik nutaamik suliniuteqartoqassasoq.
- Angalallutik ilinniartitsisartut amerlanerulernissaat aamma ungasissumit ilinniartitsisarnissaq qulakkiissavavut. Nunaqarfinni savaateqarfinnilu internetsikkut ilinniartitsisarnerup qanoq pitsaanerulersinneqarsinnaanera misissorparput. Meeqqat aqqaneq-marlunnik ukiullit angajoqqaatik qimallugit aallartinneqartassanngillat. Amerlavallaat taamak ukiukitsiginerminni angerlarsimaffitsik qimakkaagamikku artorsaateqarnerulersarput, Stine Egede oqarpoq.
Kommunip pisortaaneranik borgmesterimullu allatsimik maanna atorfinitsisoqareersimavoq. Kommunimili suli ingerlatsivinni marlunni pisortanik amigaateqartoqarpoq. Stine Egedep naatsorsuutigaa ingerlatsivinni pisortassanik piaartumik atorfinitsitsisoqarumaartoqt.
- Kiisami kommunimi pisortaaneqalerpugut, naatsorsuutigaaralu aggustip ingerlanerani ingerlatsivinni pisortaqanngitsuni pisortassanik atorfinitsitsiumaarluta. Atorfinitsitsisoqarpat politikkikkut anguniakkavut suliaralugit aallartissinnaanngussaagut, borgmesteri oqarpoq.
Ukioq killilimmmik aningaasaateqarfiusoq
Kommuni Kujalleq aningaaserivinnut namminersortunut 10 millioner koruuninik taarsigassarsisimavoq, Namminersorlutillu Oqartussat akuersisimanerisigut katillugit 25 millioner koruuninik taarsigassarsisinnaalluni. Kommuni aningaasatigut ima ajornartorsiorsimatigaaq, allaat sulisut aningaasarsiaassaannik tunniussiniarneq unammillernarsimalluni.
- Ilungersunartumik inissisimavugut. Ilaannikkooriarluta sulisut aningaasarsiassaannik tunniussiniarnerput ajornakusoortittarsimavarput. Maannali pissutsit pitsaanerulersimapput, sulisullu aningaasarsiassatik tigussaqqaarpaat. Sulisunut inissat qulit kommunip Qaqortumi sanatinniagai Grønlandsbanken suleqatigalugu maanna aningaasalerneqarsinnaanngorput, Stine Egede oqarpoq.
Kommuni Kujallermi aalajangiunneqarsimapput, atorfinitsitsisarneq unitsikkallarneqasasoq, pequttanik assigisaannilluunniit pisariaqanngitsumik pisiortortoqassanngitsoq, aamma sulisut qaangiuttoorlutik sulisarnerannut aningaasanik atuisoqassanngitsoq, qaangiuttoornisiaqarnermullu taarsiullugu sulinngiffeqartoqartassasoq. Qaangiuttoorluni sulisarnermut atatillugu borgmesterip aggustip septembarillu qaammataasa tungaannut qanoq ingerlasoqarnersoq takoqqaarusuppaa, taamanikkussamut sulisunut atatillugu aaqqiissutaagallartoq imaassinnaasoq atorunnaarsinneqassasoq oqaatigivaa. Stine Egedep erseqqissaassutigaa, kommunip 2020-mili aningaasaqarnikkut inissisimanera kommunalbestyrelsip siuliata ilisimasimagaa.
- Kommunimi amigartooruteqartoqartoq pasitsaassimavara. Kisitsisilli takugakkit tupaallalaarsimavunga. Siumulli isigissaagut aaqqiissutaasinnaasumillu nassaarniarsaraluta. Ilaatigut Narsap eqqaaniittumi Killavaat Alannguanni aatsitassarsiornissaq kuultisiorfillu neriulluarfigaakka, Stine Egede oqarpoq.
Borgmesterip naatsorsuutigaa, 2022-mi aasakkut kommuni nutaarluinnarmik aaqqissuussaalersimassasoq.