Kuannersuit pillugu innuttaasunik ataatsimiisitsinissat arlallit siulliat Narsarsuarmi ataasinngormat ingerlanneqarpoq. Ataatsimiisitsinermi Naalakkersuisut, kommunimi qinikkat allallu susassaqartut peqataapput.

Peqataasunili aatsitassarsiornerup aallartissinnaanissaanut pingaaruteqartumik inissisimasut ilaat peqataanngillat. Tassa Greenland Mineralsimi suleqataasut.

Innuttaasunik ataatsimiisitsinissat ullualunnik sioqqullugit aatsitassarsiorfik nalunaarpoq sulisumi sillimaniarnissaannut aarleqquteqarami peqataatitsissanani.

Ataatsimiinnernut videokkut peqataanissamut aamma itigartitsisimavoq. Peqataatitaqannginneq borgmester Stine Egedep (IA) uggoraa:

- GME peqataannginnera nammineerlunga uggoraara. Tunngavilersuutaat paasiuminaappoq, tassami politiinit tusarniaanerit tamarmik peqataaffigineqartussaapput, taamaattumik ernumassutissaqanngikkaluarput, Stine Egede Sermitsiaq.AG-mut oqarpoq.

Taanna napparsimagami ataatsimiisitsinermut siullernut Narsarsuarmi ingerlanneqartumut peqataanngilaq. 1. viceborgmesterili Naja Lund peqataavoq, taannalu ilisimatitsivoq innuttaasut soqutiginnilluarsimasut.

Apeqqutit akineqarsinnaanngitsut

Kujataani innuttaasunut ataatsimiisitsinerit siulliit Greenland Mineralsimit peqataaffigineqartut februarimi ingerlanneqarput. Ataatsimiisitsinissalli sioqqullugit siorasaarisoqarsimanera pillugu Naalakkersuisut peqataatitaqanngitsoorput. Februarimi ataatsimiisitsinerit nalaanni akerliussutsimik takutitsisoqarpoq. Borgmester Stine Egede, taamani kommunalbestyrelsemi ilaasortaasoq oqaluttuarpoq akerliussutsimik takutitsinerup nalaani politiit artukkerneqarsimanngitsut.

- Naja Lundip paasitippaanga Narsarsuarmi ippassaq inoqarluarsimasoq, aammalu GME amigaatigineqarsimasoq, apeqquteqarfigineqarusukkaluarmat arlalitsigut, Stine Egede oqarpoq.

Naja Lund naapertorlugu ukiut sisamat qaangiuppata politikkikkut pissaaneq allanit tiguneqassappat, Kuannersuit pillugit politikkikkut isummerneq allanngoratarsinnaanera innuttaasunit arlalinnit aarleqqutigineqarpoq. 

Soqutiginnittoqarluarnissaa neriuutigaa

Qassiarsummi unnugu ataatsimiisitsisoqassaaq. Ataatsimiisitsisullu kingorna Narsamukassapput ataatsimiisitsiartorlutik, tassanilu borgmesteri peqataassaaq.

- Neriuppunga innuttaasut peqataalluassasut, apeqqutissaminnullu tunuarsimaassanngittut. Naak uggorigaluarlugu GME peqataannginnera, Naalakkersuisunut aperinissamut periarfissaq atorluaqqunaqaaq, Stine Egede oqarpoq.

Apeqqutit, taakkulu akissutaat tamarmik hvidbogimik pineqartartumut ilanngunneqassapput, Kuannersuillu pillugit apeqqummi aalajangiinissamut tunngavilersuutitut aamma atorneqartussaallutik.