Stine Egede Inatsisartunit sulinngiffeqassaaq
Inuit Ataqatigiit Stine Egede siuttoralugu Kommune Kujallermi pissaaneq tiguaat. Kommunalbestyrelsimi sulinissani pingaartillugu borgmesteritut atuuffeqalernissani siunnerfigaa, taamaasillunilu Inatsisartunit sulinngiffeqassalluni.
Kommune Kujallermi kommunalbestyrelsimut qinersinermi Stine Egede (IA) taaguunneqarnerpaavoq, 410-nit qinerneqarluni. Partii aamma kommunimi pissaaneq Siumumit tiguaa.
Inatsisartunut qinersinermi Stine Egede 133 -nit taaguunneqarpoq, Inatsisartuni ilaasortanngorluni. Taamaattoq nuna tamakkerlugu politikkimik ingerlatsineq tunukkallarniarlugu aalajangerpoq, Kommune Kujallermi borgmesteriunissani siunnerfigalugu.
- Qinersisoqannginnerani oqareerpunga borgmesterinngussaguma kiisalu Inatsisartunut qinigaallunga, taava Inatsisartuni sulinngiffeqassallunga. Taamaattumik IA-mit sinniisumik Inatsisartuni ilaasortanngussaaq, Sermitsiaq.AG-mut oqarpoq.
Marloqiusamik qinigaaffeqarneq
Qinigaaffimmi kingullermi Stine Egede Inatsisartunut aamma kommunalbestyrelsimi ilaasortaavoq.
- Marloqiusamik qinigaaffeqarneq iluaqutissartaqartoq misigisaqarfigaara, tamanna isertornanga oqaatigissavara. Soorunami Inatsisartuni sulineq maqaasissavara. Taamaattoq maanna suliat qanoq aaqqissuussaanersut ilisimalernikuuakka, taamaattumik eqaannerusumik sulinissarput aallartissavarput, oqarpoq.
Kommuni ataasiusoq
Borgmesterisut atuuffeqarnermi imaannaanngitsunik suliassaqarluni ilisimavaa.
- Allaffissorneq aaqqissuuteqqinneqartariaqarpoq, kommunerujussuanngornermi iluatsinnikuunngilaq. Siornatigut borgmesteriusut kommunerujussuanngortoqarnera aallaavigalugu sulinikuunngillat. Maanna kommuni ataasiusutut sullinneqartariaqalerpoq, Stine Egede oqarpoq.
IA-mit Mikivsuk Thomassen Inatsisartuni qinersinermi siullertut sinniisaasoq valg.gl-imi takuneqarsinnaavoq. Taamaattumik Mikivsuk Thomassenip Stine Egedep Inatsisartuni inissaa tigussavaa.