Stine Bosse: Suliffeqarfiit Kalaallit Nunaanni inuussuttunut akisussaaffeqartariaqarput

Tele-Postip siulersuisuini siulittaasoq Stine Bosse isumaqarpoq, suliffeqarfiit inuiaqatigiinni suliassanik, politikkerit suliarisinnaanngisaannik kivitseqataasariaqartut. Tele-Postip imminut napatinnissamut nalunaarusiaani tullermi tamanna takuneqarsinnaassasoq neriorsuivoq.

Tele-Postip imminut napatinnissamut nalunaarusiani siulleq siorna saqqummiuppaa, tassani ilaatigut FN-ip Nunarsuarmi anguniagai ilanngunneqarsimapput, suliffeqarfiit inuiaqatiinnni akisussaassusilimmik imminullu napatittumik, nunami avataanilu iliuuseqartarnissamut aqqutissiuunniarlugit.

Ukioq manna nalunaarusiassaq suliaralugu aallartinneqarpoq, inuusuttut ilinniartitaanerlu imarinerussagai, siulersuisuni siulittaasoq Stine Bosse neriorsuivoq.

- Kodelerinermik ilinniartitsilluta aallartitartup siunnerfipput malillugu ingerlatiinnassavarput. Tassa suliniutit ilaat tamakku aqqutigalugit allanngueqataasinnaavugut, Stine Bosse Sermitsiaq.AG-mut oqarpoq.

Suliassaqartartoq politikkerinit suliarineqarsinnaanngitsunik

Tele-Post qarasaasianik kodelerinermik ilinniartitsinissaq pillugu Kommuneqarfik Sermersuumut isumaqatigiissuteqarsimavoq, tassani ilusilersuineq, nutaaliorneq kodelerinerlu qitiutillugit. Tele-Posti klassinik siullernik ilinniartitsinermit misilittagaqalerniariarpat, ilinniartitsineq nunap sinneranut atuutsinneqalissaaq, Stine Bosse neriorsuivoq.

Nalaatsornerinnaanngilaq ilinniartitaaneq inuusuttunillu sunniiniarneq telemit qitiutinneqarmat.

- Politikerit sorpassuarnik suliaqarsinnaapput, aammali suliassaqartarpoq suliarisinnaanngisaannik, siulersuisuni sulittaasoq oqarpoq.

- Siusinnerusukkut inuusuttorsuit inuummarisseruttortut piniartukkunnit/aalisartukkunnit utoqqaanerusunit isumassorneqartarput, inuusuttullu najukkamut iluaqutaasussamik utoqqaat misilittagaannik piginnaasaannillu ilinniartinneqartarlutik.

Ataatsimut akisussaaffiusoq

Akisussaaffiup siusinnerusukkut inuiaqatigiinni allanit tigummiarneqartarsimaneratut, Tele-Post suliffeqarfittut akisussaaqataasutut isigineqassasoq, Stine Bosse isumaqarpoq.

- Suliffeqarfissuit akisussaaffimmik tiguserusunngippata, susoqassanngilaq. Ilisimasaqarpugut qanorlu iliortoqarsinnaaneranik ilisimasaqarluta inuusuttorpassuarnit iluaqutigineqarsinnaasunik. Uagummi aamma nammineq soqutigisaraarput, inuussuttorpassuit akornanni it-mut tunngatillugu soqutiginnittoqalernissaa, siunissami aamma pikkorissunik sulisoqartarniassagatta.

Stine Bosse isumaqarpoq, suliffeqarfiit tamarmik imminut napatinnissaq nunarsuarmilu anguniakkat eqqarsaatigalugit suliaqartariaqartut, akuersaarpaali, piginnittut aningaasanik isaatitsinissaat soorunam siullertut isumagineqartussaasut.

- Tamanna inissippat, aningaasallu sinneqarpata, taava inuiaqatigiit avatitsinniittut isumaginissaannut pisussaaffeqarpoq, iliuuseqarfiusinnaasunilu akisussaaffimmik tigusilluni, Stine Bosse naggasiivoq.

Powered by Labrador CMS