Stilladsimit nakkarneq: Sanasutut misilittagalik ajunaartoq Esbjergimeersuuvoq
Sanasoq ataaseq Esbjegimeersoq marlunngornermi Nuummi sanaartorfimmiit nakkarami toqukkut qimaguppoq, Suliffeqarfimmi tamarmi pisoq attortissutigineqartoq, pisortaaneq ilisimatitsivoq.
JydskeVestkysten naapertorlugu, marlunngornermi ullup-qeqqata siornatigut Nuummi stilladsimiit nakkarluni toqukkut qimaguttoq tassaavoq angut danskiusoq 60-inik ukiulik Esbjergimeersoq.
Tusagassiorfimmit angutip qanigisai attavigineqarsimapput.
Angut sanasutut ilinniarsimasoq Esbjergimi sanasut suliffeqarfiini assigiinngitsuni ukiut ingerlaneranni sulisarsimavoq.
Taamatut pisoqartussaanngitsoq
Angutip taassuma 60-inik ukiullip Kalaallit Nunaanni suliffeqarfimmi MT Højgaardimi sulisuusup, marlunngornermi ullup-qeqqata siornatigut stilladsimiit nakkarneranut suna pissutaanersoq nalunarpoq.
- Suliffeqarfimmi tamarmi attortissimaqaagut.
Torben Nielsen Kalaallit Nunaanni MT Højgaardip ingerlatseqatigiiffiutaani pisortaanerusoq taamatut oqarpoq.
- Taamatut pisoqarnera soorunami ajuusaarutigeqaarput. Suliffeqarfimmi sumiiffinniluunniit allani taamatut pisoqartussaanngilaq. Tamanna qularutigineqassanngilaq, pisortaaneq Sermitsiaq.AG-mut oqarpoq.
Nalunaarusiortoqassasoq
Torben Nielsenip ilismatitsissutigaa, politiit suliffinnillu misissuisartut ajunaarnermut sunarpiaq pissutaanersoq misissuiffigileruttoraat, taamaammallu pisoq pillugu maannakkorpiaq oqaaseqaqqissinnaanani.
- Nalunaarusiaq taamaalluni takkuttussaavoq. Nalunaarusiaq isummerfigissavarput. Taamatut pisoqaqqinnginnissaa qulakkeerniarlugu siunissami allatut qanoq iliuuseqarsinnaanerluta soorunami misissorparput.