isumaqatigiinnginneq
Steen Lyngep partiiminit taperserneqannginnini ugguaraa
Inatsisartunut ilaasortaq Steen Lynge (A), urani pillugu inut taasitinneqarnissaanik kissaateqarnermini partiimi siulittaasuminit taperserneqanngilaq. Knud Kristiansenili (A) tamanut nipaappoq
Sapaatip-akunnerani kingullermi Inatsisartunut ilaasortaq Steen Lynge (A) oqariartuuteqarpoq, uranip atorneqarnissaa inunnik taasissutigineqarnissaa kissaatigalugu.
Taanna ilaatigut Nuuk TV-mut oqaluttuarpoq, tamanna pillugu innuttaasut aperineqartariaqartut, apeqqut tamanna inuiaqatigiit soqutigimmassuk.
Atuaruk: Urani pillugu inuit taasisinneqarnissaat Steen Lyngep kissaatigaa
Atassummilu nuimasup taasititsinissamut Inatsisartunut siunnersuummik piareersarnini aallartereersimavaa.
Atassut taasisitsinissaq pillugu avissaartuuttut
Steen Lyngeli maannakkut partiimi siulittaasuanit Knud Kristiansenimit taperserneqarani, Sermitsiaq.AG-mut ullumikkut oqaluttuarpoq.
- Oqariartuuteqarnera pillugu partiimit taperserneqarlungalu taperserneqanngilanga. Partiimili siulittaasuma (Knud Kristiansen, red.) matumani tapersinngilaanga, ugguaraaralu, Steen Lynge oqarpoq.
Siulittaasoq nipaatsoq
Politikerilli nuimasup isummani attatiinnarpaa.
- Inuit taasisinneqarnissaat suli pingaaruteqartoq isumaqarpunga, Kalaallit Nunaatami tusaamaneqarnera innarlerneqarsinnaavoq. Uranilu pillugu paasititsiniaasoqarlunilu innuttaasuni oqallittoqartariaqartoq aamma isumaqarluinnarpunga, Steen Lynge erseqqissaavoq.
Sermitsiaq.AG-p ulluni arlalinni Atassummi siulittaasoq, Knud Kristiansen, apersorumasaqattaaraluarpaa. Taannali tutsaqarsimanngilaq.
Aamma takukkit:
Uranip innuttaasunut taasissutigitinnissaata taamaatiinnarneqarnera oqaaseqarfigiumanngikkaat
Aatsitassanut naalakkersuisunngorlaaq: Innuttaasut taasitinneqarnissaat puiguinnarsiuk