Aleqap atornerluinera
Steen Lynge: Taama aliasutsiginikuunngilanga
Atassutip naalakkersuisorisimasaat marluk namminneerlutik tunuartut oqarput pisumut malugusullutik
Atassummi Naalakkersuisunut ilaasortaasimasut pingasunngornermi tunuarput.
Pisoq Steen Lyngemut annertuumik eqquivoq.
Inatsisartut ataatsimiinnissaat sioqqullugu naalagiaqatigiittoqareersoq akerliussutsimik takutitsisoqarnera aamma Siverth K. Heilmannimut eqquivoq.
- Inuiattut assuutigut atortillugit aatsaat taama kanngusutsigaanga. Inatsisartunut ullaaq ilaasortaavunga, maannakkut ilaasortaajunnaarpunga. Tusagassiutinut nalunaarutip nassiunneqarnerani kukkusoqarnera pissutaalluni nalunaarutigineqanngilaq aamma uanga Naalakkersuisunut ilaasortaajunaartunga. Steeni tunuarmat uanga aamma assinganik iliuuseqarpunga, Siverth K. Heilmann oqarpoq.
Steen Lynge pisumut aamma assut malugusuppasippoq. Oqaaseqannginnermini anersaaqqaarpoq.
- Pisumut malugusuttorujussuuvunga. Suliara nuannarigaluaqaara. Naleqartitakkali pillugit pilliuteqarsinnaanngilanga. Naleqartitakka uannut naleqartorujussuupput, Steen Lynge oqarpoq.
Inatsisartunut qinersisoqassaaq novembarip 28-ani.