Steen Lynge sanasunut ilanngaateqalersitserusuppoq

Nammineq inigisamik aserfallatsaaliiniaraanni imaluunniit nukinnik sipaarnerunissamut sanasunik suliaqartitsinermi akileraarutitigut ilaanngaasoqartariaqarpoq.

Tamanna 20.000 koruunit tikillugit kiisalu ukiuni sisamani misiliutitut pissasoq, Steen Lynge (A) siunnersuuteqarpoq.

Kiassarnermut aningaasartuutit ikinnerusut
Atassummi politikeri tamatuminnga arlalinnik iluaquteqarnissamik naatsorsuuteqarpoq.

- Siullertut siunnersuutip kingunerissavaa, illutillit/iniutillit amerlanerusut inigisap nukimmik sipaarnerunissamik sanasunik suliaqartitsisinnaalernissaat, taamaasiornikkut innuttaasut ataasiakkaat kiassarnermut aningaasartuutitigut sipaarfigilersinnaassavaat, siunnersuuteqarnermini tunngavilersuivoq.

Inuiaqatigiinnilu aamma ataatsimut ikummatissamik atuinikinnerulernissaq taamaasillunilu aamma CO2-imik aniatitsinerup annikinnerulersinnaanera naqissuserpaa.

- Aaqqissuussinerup aamma kingunerissavaa, suliffiit amerlanerusut pilersinneqarnissaa, namminneq illugisanut/inigisanut aningaasalersuerusussutsip annertusineratigut, taanna allappoq.

Sanasut amigaataanissaat ernummataasoq
Aningaasaqarnermut naalakkersuisulli, Randi Vestergaard Evaldsenip (D), siunnersuut maannamut sanasunik amigaateqarnermik kinguneqarsinnaanera aarlerisaarutigaa.

- Aningaasarsiorneq pitsanngoriartormat illoqarfiillu ilaanni sanaartorneq ingerlanneqangaatsiareermat sanasunik suliaqartitsinermut atatillugu aningaasartuutinik akileraarutitigut ilanngaateqarsinnaatitaanerup eqqunneqarnissaa naleqquttuunersoq isumaliutigilluaqqissaartariaqarpoq, taanna akissuteqarnermini allappoq.

Ataatsimut aaqqiissut
Randi Vestergaard Evaldsenili siunnersuummut itigartitsinngilaq, kisianni tamatuma saniatigut isumaqarput inunnut ataasiakkaanut inuussutissarsiuteqartunullu akileraarsitseriaatsit sinaakkutaat pitsanngorsaaffiginiarlugit sulinermi siunnersuutigineqartoq ilanngunneqartariaqartoq, taamaattumillu allannguutissatut siunnersuummik saqqummiussiniarpoq.

Allannguutissatut siunnersuummut amerlanerussuteqartunit taperserneqarpoq, ataatsimiititaliamullu suliassanngortinneqarniarpoq.