Staycation naatsorsuutigisamit ingerlalluarnerusoq
Staycation, tassa nunap iluani aasaanerani sulinngiffeqarnermi angalanerit nunatsinni innuttaasunit atorluarneqarpoq. Travel By Heart - Greenland, Kalaallit Nunaanni misigisassarsiorluni angalanernik nioqquteqartoq aasaq manna ulapingaatsiarsimavoq.
Elise Bruunip suliffeqarfiutaa Travel By Heart - Greenland, Kalaallit Nunaanni misigisassarsiorluni angalanernik nioqquteqartoq, aasaq manna sullitaqangaatsiarsimavoq. Suliffeqarfik coronavirusip nunatsinni nappaatigineqaqqaalernerata nalaani aallartisaraluartoq, taamaattoq nioqqutissat soqutigineqarnerat annertusiartuinnavissimavoq.
- Ingerlalluarsuaarpunga. Aasaanerani ulapingaatsiarpunga, sulilu suliassaqangaatsiarlunga. Inuit angalanissanik pisiniarlutik suli saaffiginnittarput, taamaammat naatsorsuutigisamit ingerlalluarnerujussuuvunga, Elise Bruun, Travel By Heart - Greenlandimik piginnittoq oqaluttuarpoq.
Nunatsinnilu angalasut amerlanerpaartaat kalaalliupput.
- Staycation atorneqarluarpoq. Angalasut 90 procentii nunatsinni najugaqarput. Angalasullu sinneri, 10 procentit missaat angalanissaminnik qangali kinguartitsisuusimasarput, nunallu ammaqqinneranit nunatsinnut tikillutik misigisassarsioriartortuullutik, Elise Bruun oqarpoq.
Kujataa soqutigineqarluarpoq
Nunatta iluani aasaanerani angalanissamik Kim Kielsen kaammattuuteqareersorlu, Elise Bruun saaffigineqarluartalersimavoq. Kangerlussuaq tikitassatut majimi soqutigineqarluarpoq. Aasaaneranili Kujataa ornigarneqarneruvoq, Avannaa Kangerlussuarlu ornigarneqarluartut tulliattut pingajuattullu inissittut.
- Kangerlussuarli maanna ornigarneqarluaqqilerpoq. Isumaqarpunga inuit angalarusulluinnalersut. Taava angalaffissat akikinnerusut misissornerulertarpaat, Kangerlussuarlu angalaffissatut akikinnerusutut nioqqutissaatigaara, Travel By Heart - Greenlandimi piginnittoq oqarpoq.
Elise Bruun ilisimatitsivoq angalatitsinerit ukiuunerani ingerlanneqaannassasut, aappaagumullu pilersaarutit aallartereersimasut.