Station Nordimut aqqutit pillugit apeqqutit suli akissutissarsineqanngitsut

Nunanit allaneersut ilisimatusariartortartut Station Nordimut, taamatullu sumiiffimmi ilisimatusariartortarfimmut aqqutaat pillugu apeqqutit suli akissutissarsineqanngillat.

Villum Research Station

Svalbardimiit Station Nordimut timmisartorluni tikissinnaaneq politiinit ukioq nutaamit atorunnaarsinneqarmat ilisimatusariartortarfik Villum Research Station annertuumik eqqugaavoq.

Angalasut Ittoqqortoormiit eqqaaniittoq Nerlerit Inaat aqqusaaqqaartariaqalerpaat, tamannalu akisuneruvoq. Angalaneq siornatigut 125.000 koruuneqarsimasoq maanna 500.000 koruuneqalerpoq.

Pissutsit atorneqalersut, ilisimatusariartortarfiup pisortaata, professor Henrik Skovip Aarhus Universitetimeersup ‘ajorluinnartutut’ isigai.

- Tamanna isumaqarpoq Villum Research Station maannakkut nunanit allanit ilisimatusariartorusuttunut matoqqasoq. Ajorluinnarpoq, ilisimatusariartorfissap taama ittup ilisimaneqalernissaa piffissangaatsiarujussuarmik tigusisarpoq, Sermitsiaq.AG-mut oqarpoq.

Pissutsit taama ilermata Aaja Chemnitz Larsen (IA) inatsisinik atuutsitsinermut ministeri Søren Pape Poulsen (K) januaarip pingajuani apeqquteqarfigaa sooq periuseq allanngortinneqarnersoq, toqqaannartumillu aqquteqalersitsiniarluni qanoq aaqqiisoqarsinnaanersoq.

Paasissutissat amerlanerit pisariaqartikkai

Imaaliallaannarli paasineqarsinnaarpasinngilaq. Søren Pape Poulsen januaarip 30-ani ima akissuteqarallarpoq:

- Inatsisinik atuutsitsinermut ministeriaqarfiup Illersornissamut ministeriaqarfik, Nunanit allamiunut- Akuutitsiniarnermullu ministeriaqarfik Kalaallit Nunaannilu Politiit akissuteqarnissamut atugassanik paasissutissanik piumasaqarfigai. Apeqqutip tamakkiisumik akinissaanut ilisimasat pisariaqartinneqartut maanna pigineqanngillat. Paasissutissat tiguneqarsimalereerpata apeqqutit Inatsisinik atuutsitsinermut ministeriaqarfiup akissavai. Naatsorsuutigineqarpoq apeqqutit februaarip naanerani akineqarumaartut.

Ajornartorsiut pilerpoq killeqarfinni suleqatigiinnermi Schengenimi Svalbard peqataanngimmat. Schengenip avataaniit nunamut tikissagaanni, timmisartoqarfik politiilik tikiffigineqartariaqarpoq – Station Nordilu politeeqanngilaq.

Periutsip allanngortinneqarnerani Citronen Fjordimi aatsitassarsiornissamik pilersaaruteqarneq aamma eqqorneqarpoq, taavungami tikittussat Station Nordikkoorlutik tikittarput.

Powered by Labrador CMS