tunniussineq

Stark peqatigiiffimmut aningaasarpassuarnik katersisoq

Stark Kalaallit Nunaat 125.500 koruuninik katersisimavoq, taakku maanna peqatigiiffik Meeqqat Inuunerissunut (MIBB) tunniunneqarput.

Uani MIBB-p aningaasat Lars Frandsenimit Starkimeersumit pissarsiarai

Aningaasat meeqqat inuunerinnerulernissaannik inersimasut qanoq pilersitsisinnaanersut pillugu videolianut atorneqassapput.

Qujamasuttut
- MIBBimit qujamasuutigisorujussuuarput peqatigiiffitsinni kajumissuseq atorlugu Kalaallit Nunaanni meeqqat inuunerinnerulernissaannik sulinerput suliniuteqarnerpullu STARKip tapersersorusullugu toqqarsimammatigut. Angorusutavut tassaapput inersimasut, taakkuusut meeqqat pitsaasumik inuuneqarnissaannik qulakkeerinnittussat. Tapiissutit tunniunneqartut atorlugit videolianik sanaartorneq aallartissavarput, qanoq iliorluni meeqqat pitsaasumik inuuneqalersinneqarsinnaanersut pillugu inuit apeqqutaannut akissutinik imalinnik, siulittaasoq Arnakkuluk Jo Kleist, tusagassiuutinut nalunaarummi oqarpoq.

MIBB ukiuni qulinngulersuni atuutereersimalerpoq, ukiullu ingerlanerini peqatigiiffik inersimasorpassuarnik naapitaqartarpoq namminneq najukkaminni meeqqat pillugit iliuuseqarusuttunik, qanorli iliornissaminnik nalornissuteqartartunik.

- Aperinnga aqqutigalugu inuit nalinginnaasut kinaassutsiminnik isertuussillutik apeqquteqarsinnaapput, apeqqutillu toqqakkat videot atorlugit akineqartassapput, MIBBip nittartagaatigut aamma Facebookikkut siammarterneqartassallutik, peqatigiiffik allappoq.

Arlaleriarluni tapersiisoq
Starkip arlaleriarluni MIBBi tapersersortarpaa, suliniutillu assigiinngitsut piviusunngortinneqarnerinut peqataasimalluni.

Powered by Labrador CMS