Stark Fonden Mælkebøttenimut 200.000 koruuninik aningaasaliissuteqartoq
Stark Fonden aalajangersimavoq, Kalaallit Nunaanni meeqqat atugarliortut 200.000 koruuninik tunissuteqarfiginiarlugit
Stark Fonden paaqqinnittarfimmut imminut pigisumut, Mælkebøtten, inuusuttut patajaannerusumik atugaqalersinniarlugit suliaqartartumut, sisamanngorpat aningaasanik tunniussissaaq.
Aningaasat ininik mikinerusunik pilersitsinermut atorneqassapput, init inuusutunit marlunnit-pingasunit avinneqarsinnaasut sulisunit sulianut tunngatillugit ilisimasalinnit nakkutigineqartassapput. Mælebøttenimi pisortaq Kirsten Ørgaard naapertorlugu, inuusuttut – sapinngisamik – inissat nutaat pilersinniarnerannut aaqqissunneqarnerannullu peqataatinneqassapput, tusagassiorfinnut nalunaarummi taamatut allassimasoqarpoq.
Tunineqarneq nuannaarutaasoq
Stark Fondenimi siulersuisunut ilaasortap Laurits A. Jørgensenip nuannaarutigaa, inuusuttut atugarliortut ilinniagaqalernissamut pitsaasumik tunngavissinniarlugit ikiorsinnaagamigit.
- Mælkebøttenimut aningaasanik tunniussisinnaanerput nunaarutigeqaarput, inuusuttut taamaalillutik toqqissisimanartumik tunngavissaqalersinnaapput kiisalu sulisunit suliatigut ilisimasalinnit tapersersorneqarsinnaassapput. Neriuutigaarput ineqarfissaq Mælkebøttenip sanatinniagaa, ajornartorsiutaasartut, soorlu kiserliortarnerup, aporaattarnerup atornerluisarnerullu pinaveersaartinneqarnissaannut tapertaassasoq. Mælkebøttenimi inersimasut ilitsersuisarnerisigut tapersersuisarnerisigullu inuusuttut inerikkiartornerat inersimasunngornissamullu piareersimanerat, taakkununnga ilanngullugu ilinniagaqarnissaannut periarfissat pitsanngorsaaffigineqassasut upperaarput, Laurits A. Jørgensen oqarpoq.
Najukkami tunniussimasumik suliaqartarneq
Kalaallit Nunaanni Starkimi pisortaq Poul Erik Nørnberg oqarpoq:
- Kalaallit Nunaanni Stark najukkami tunniussimasumik suliaqartarnissamik pingaartitsisuuvoq, aamma najukkami atuartut atorfinitsinneqarnissaat inuusuttullu suliffimmik misiliinissaat pillugit Majoriaq suleqatigilluartarparput. Nuummi, Aasianni Tasiilamilu niuertarfiutivut maannakkorpiaq atuartuuteqarput, sanaartornermi atorneqartartut ukkataralugit tuniniaanermik ilinniagaqartunik, aamma atuartut niuertarfiutitsinni allani atorfinitsissinnaavavut. Qularinngilara, Mælkebøttenimi suliniutit suliallu nassataannik, inuusuttut amerlanerit ilinniagaqarnermikkut ingerlaqqinnissamut periarfissaqalissasut. Taamaalilluni aamma Starkimi Kalaallit Nunaanni niuertarfiutitsinni tullianik atuartuuteqarnissaq periarfissagissaarnerulissaaq
Stark Fonden pillugu
Stark Gonden 1946-mili ukiut tamaasa suliniutinut, ilisimatusarnernut sulianullu, Danmarkimi inuusuttut assarsorlutik suliaqarnissamut soqutiginnittut tapersersorniarlugit, kiisalu ajunngitsuliorniarluni suliniutinut, tassa assassorluni suliaqarnermi inuiaqatigiinnut iluaqusiisinnaasunut, aningaasaliissuteqartarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...