§ 37: Maanna Anthon sulissaaq

Paragraf 37 naapertorlugu apeqquteqaat siulleq Naalakkersuisunut nassiunneqaqqammerpoq. Inatsisartunilu ilaasortani apeqquteqarnerpaasarsimasut ilaat massakkut akissuteqassaaq.

Inatsisartuni ilaasortaq Mikissuk Thomassen (IA) qinigaaffiup siuliani apeqquteqarnerpaasimasut ilaannut Anthon Frederiksenimut maanna Isumaginninnermut Inatsisinillu Atuutsitsinermut Naalakkersuisunngorsimasumut paragraf 37 naapertorlugu apeqqutaammik siullermik nassiussivoq.

Qinersinissamik suaarutiginninneq aporfiusoq

Kinguaassiutitigut atornerluisarnermut akiuiniarluni suliniut naammassineqarsimangaluartoq, Kim Kielsenip qinersinissamik suaarutiginninnera peqqutigalugu Naalakkersuisunit oqaluuserineqanngitsoorpoq.

Tamanna tunngavingalugu Mikissuk Thomassen marlunnik apeqquteqarpoq:

Naalakkersuisut siuliisa kinguaassiutitigut atornerluinernik ataatsimut suliaqarluni akiuniniarnermut suliniutaat “Killiliisa”-mik taaguuserneqarsoq Naalakkersuisut nutaat naammassillugu suliniarpaat?

Kinguaassiutitigut atornerluisarnernik akiuiniarluni suliniut “Killiliisa” nanginneqarniarpat, suliniut qaqugu naammassillugulu saqqummiunnissaa naatsorsuutigineqarpa?

IA-mi politikeri apeqquteqaammut tunngavilerlersuilluni allappoq:

2018-imut aningaasanut inatsimmi ilaasoq

- Suliniut 2018-mut aningaasanut inatsimmi aningaasalerneqarpoq
taamaammallu naatsorsuutigaarput piaartumik naammassineqassasoq suliniut atuutilerniassammat suliassallu aallartillutik.

Eqqumiiginartumillu IA-p siulittaasua Sara Olsvig Isumaginninnermut Naalakkersuisuunermini suliniut akisussaaffigisimavaa, akuersissutigineqarnissaalu angumerinngitsoorsimallugu.

Anthon Frederiksen Partii Naleqqameersoq akissuteqarnissamut ullut qulit periarfissarai.

Powered by Labrador CMS