Sri Lanka: Qaartartumeerisoqarnerani ikinnerpaamik 156-it toqutaasut
Sri Lankami qaartartumeerisoqarmnerani inuit 150-it toqutaapput hunnorujukkuutaallu aqqunartiterneqarlutik
Illoqarfiit pingaarnersaanni Colombomi politiinut tusarfiit AFP-mut oqaatigaa, ikinnerpaamik inuit 156-it toqutaasimasut – taakkunannga ikinnerpaamik 35-t nunanit allaneersuullutik.
Oqaluffinni pingasuni aamma akunnittarfinni pingasuni qaartitsisoqarneranik nalunaarutiginnittoqarneraniit akunnerit pingasut qaangiunneranni illoqarfiit pingaarnersaata Colombo qanitaani Dehiwelami qaartitsinerit arfineq-marlussaat nalunaarutigineqarpoq.
Qaartitsinerit arfineq-marlussaanni ikinnerpaamik inuit toqutaasimasut politiit oqaaseqartartua AFP-mut oqarpoq. Qaartitsineq uumasuusivissuup eqqaani pivoq.
Colombo-mi aamma arfineq-pingajussaannik qaartitsisoqartoq, AFP allappoq.
Kingulliit:
Qallunaat aqqunartitserneqartunit ilaasimasinnaapput toqutaasimasinnaallutillu.
Napparsimavinni tusarfiit AFP-mut paasissutissiaraat, amerikamiut, tuluit hollandimiullu toqutaasut akornanniittut.
Sri Lankami qallunaanik aqqunartoqarsimasoq toqutaasimasoqarsimasorlu oqaatigineqarpoq.
Tamanna Nunamut Allanut Ministereqarfiup Twitterikkut paasissutissiaraa. Tamannalu suli uppernarsarneqarsinnaanngikkallartoq, oqaatigineqarpoq.
Saassussisoqarnerani inuit 400-t sinnerlugit aqqunarnarneqarsimasut, politiit napparsimavimmilu pisortap Reuters-imut oqaatigaat.
Qanigisat attaveqarfigikkit
Nunanut Allanut Ministereqarfiup qallunaat tamaasa kaammattortaap Colombo eqqaaniittut qanigisatik attaveqarfigissagaat.
- Oqaluffinni akunnittarfinnilu sakkortuumik qaartitsisoqarpoq. Najukkami oqartussat innersuussutaat malissigit, allassimavoq.
Oqaluffimmi ataatsimi St. Sebastian's Katuwapitiyamiittumi inuit 50-t sinnerlugit toqutaapput, politiit Reutersimut oqarput.
Najukkami nutaarsiassaqartitsiviit nalunaarutigaat, Battivaloami oqaluffimmi qaartitsisoqarnerani inuit 25-t toqutaasimasut.
Akunnittarfiit pingassut qaartinneqartut
Akunnittarfiit pingasut qaartinneqartut Colombomiipput tassaasut Shangri-La Colombo, Kingsbury Hotel aamma Cinnamon Grand Colombo. Akunnittarfinni qanoq amerlatigisut toqutaasimanerat erseqqissumik paasissutissiarineqanngilaq.
Sri Lankami innuttaasut imminnut sorsunnerat ukiuni qulini uninngasimapput. 2009 tikillugu pikitsitsiniat illoqarfiit pingaarnersaanni qaartartumeeralutik saassussisarsimapput.