Spiralilersuisimanerup misissuiffigineqarnissaa aallartinneqalersoq

Spiralilersuisimaneq arlaannaannulluunniit attuumassuteqanngitsumit qulaajaaffigineqartussanngorpoq.

Tamanna pissaaq Danmarkik Kalaallillu Nunaata qulaajaasoqarnissaanik isumaqatigiissuteqarsimanerannut atatillugu.

Peqqissutsimut ministerip Magnus Heunickep(S) folketingimi ilaasortamut Aki-Mathilda Høegh-Damimut (S) akissuteqarnermini tamanna uppernarsarpaa.

Inatsisartut siusinnerusukkut aalajangiussimavaat qulaajaasoqassasoq.

Pisimasoq tamarmi qulaajaaffigineqassasoq

Kalaallit arnartaat 4500-t missaanniittut 1960-ikkunniit 1991 tikillugu spiralilersorneqarsimapput. Arnarparsuit akuersissutitaqanngitsumik spiralilerneqarsimallutik.

Danmarkimit Kalaallillu Nunaannit sapaatip-akunnerani kingullermi isumaqatigiissutigineqarpoq, Sorsunnersuup aappaaniit ullumimut pisimasut qulaajaaffigineqassasut.

Peqqissutsimut ministerip folketingimi ilaasortamut akissuteqarnermini oqaatigaa, ”kalaallit arnataat taakkulu ilaqutaat ataqqiniarlugit”, Danmarkimi naalakkersuisut Naalakkersuisullu spiralilersuisoqarsimaneranik qulaajaasoqarnissaa isumaqatigiissutigisimagaat.

Aki-Matilda Høegh-Dam isumaqarpoq, Danmarkip Kalaallillu Nunaata akornanni pisimasut arlaannaannulluunniit attuumassuteqanngitsumit misissuiffigineqarnissaat pingaaruteqartoq. Spiralilersuisoqarsimanera kisiat pinnagu, piffissalli ingerlanerani pisimasut tamarmik misissuiffigineqartariaqartut oqaatigalugu.

Suut tamarmik saqqummiunneqassasut

Taassuma oqaatigaa, Kalaallit Nunaanni inuit pisinnaatitaaffii piffissap ingerlanerani arlaleriarluni innarlerneqartarsimasut.

- Pisimasorpassuit pineqartut tusatsiagaannaanersut ilumoortuunersulluunniit ilisimanngilarput. Pingaartumik spiralilersuisimanerup kusanaatsup saqqummiunneqareernerani. Pisimasut taakku tusarsimavagut, isumaqarattali "tamanna ajorluinnartuusoq" tusaanngitsuusaartarsimallutigu, taanna oqarpoq.

Kalaallip folketingimi ilaasortap oqaatigaa, "nakorsaq iluarpianngitsoq" imaluunniit aaqqissuussaasumik innarliisoqarsimanersoq ilisimaneqarsimanngitsoq.

- Taamaammat pingaaruteqarpoq, suna aaqqissuussaasumik sunalu aaqqissuussaanngitsumik pisimanersoq paasiniarlugu suut tamarmik saqqummiunneqarnissaat, Aki-Matilda Høegh-Dam oqarpoq.