Spiralilersuisimaneq sakkortuumik qisuariarfiginqartoq: Tujorminarlunilu kanngunarpoq

Spiralilersuisimanerup qanoq ingasatsiginera saqqummiunneqarmat politikkerit arlallit Naalakkersuisullu sakkortuumik qisuariarput.

- Tassani suleriuseq atorneqarsimasoq kanngunarluinnarpoq, kalaallillu arnaartaannutmitallerneruvoq ikkaatilliinerullunilu, Hans Enoksen (N) oqarpoq.

DR-ip podcast nutaaq aqqutigalugu kalaallit arnartaasa tuusintilikkaat akuersissutitaqanngitsumik spiralilersorneqarsimanerat saqqummiussimavaa

Arnat 4.500-t 1966-p 1975-illu akornanni spiralilerneqarsimapput, taamanikkut nunami arnat ernisinnaasut 9.000-it missaanniissimallutik. Spiralilersuineq 1975 tikillugu ingerlanneqarsimavoq.

Politkkerit arlallit saqqummiunneqartumut sakkortuumik qisuariarput. Ilaatigut Naleqqami siulittaasup Hans Enoksenip pisimasoq tujorminarnerarlugulu kanngunarnerarpaa:

- Tassani suleriuseq atorneqarsimasoq kanngunarluinnarpoq, kalaallillu arnaartaannut
mitallerneruvoq ikkaatilliinerullunilu, tunngavilersutaallu assut amilaarnaarluni. Tassalu
anguniagaasimalluni Kalaallit amerliartornissaat unitsittariaqartut, kalaallit arnartaat
naartusinnaajunnarlugit, Hans Enoksen tusagassiorfitsigut nalunaaruteqarluni allappoq.

Naakkittaatsumik suliarineqarsimasorpassuit

Hans Enoksen isumaqarpoq, pisimasoq Inatsisartuni piaartumik oqaluuserineqartariaqartoq kiisalu. Naalakkersuisut Danmarkimut qisuariaateqartariaqartut.

Folketingimi ilaasortap Aaja Chemnitz Larsenip (IA) Folketingimi ilaasortaqatini Aki-Mathilda Høegh-Dam assigalugu piumasaraa, danskit naalakkersuisuisa pisimasoq qulaajaaffigissagaat.

Chemnitz Larsen Facebookikkut allappoq, naakkittaatsumik suliarineqarsimasorpassuit amerlalluinnartut.

- Meeraanerminni misileraataasimasut aallarniutigaavut, inatsisitigut ataataqanngitsut maanna sammivavut sulilu inatsisinut unioqqutaasumik meeravissiartaartoqartarsimanera amigaatigalutigu, maannalu Spiralilersuisimaneq sammineqalerluni. Pisimasoq ataatsimu igisineqassaaq danskillu inuppassuit inuunerannik ajoqusiisumik politikkeqarsimallutik.

Naalakkersuisut qulaajaaqqusisoqarneranut tapersiisut

- Taamaammat arlalippassuit ajoquserneqareersimammata katsorsaanissap qanoq qulakkeerneqarsinnaanera pillugu Danmarkimi naalakkersuisunut arlalinnik apeqquteqarsimavunga, aamma apeqqutigisimavara Danmarkimi naalakkersuisut pisortatigoortumik qulaajaasoqarnissaanik qulakkeerinninniarnersut, susoqavissimanersoq erseqqissummik paasiniassagatsigu, aj Chemnitz Larsen Facebookikkut allappoq.

Naalakkersuisoq Mimi Karlsen qulaajaasoqarnissaata pisariaqartinneqarneranik oqartoqarnera isumaqatigaa:

- Naalakkersuisut tungaannit isumaqarpugut taamani inunngortartut ikilisarniarlugit naalagaaffiup iliuuserisimasaa kukkunerusoq, kissaatigaarpullu pisimasut qulaajarneqassasut pisimasut qanorpiaq issimanersut paasiniassagatsigu. Arnat misigisaminnik saqummiisut nersualaarusuppakka, naak artornaraluartoq misigisaminnik oqaluttuummatigut qutsavigalugit. Misigisaat sakkortupput, saqqummertariaqarpulli oqaluttuarisaanitsinnut ilaammata, Mimi Karlsen oqaaseqaateqarluniallappoq.

Sermitsiaq.AG-mt Danmarkimi naalakkersuisut pisimasumut oqaaseqartinniarneqarput.

Powered by Labrador CMS