Spiralilersuisimaneq pillugu nunani tamalaani isumaqatigiissutinik unioqqutitsinerit qulaarneqassasut
Ilisimatusartut nalunaarusiaat Naalakkersuisut utaqqiumanagu spiralilersuisimaneq pillugu qulaajaanerit annertunerusariaqartut isumaqarput.
Nunatta Nakorsaaneqarfiata spiralilersuisimanermut tunngatillugu nalunaarutigineqartut pillugit paasissutissat pingasunngormat saqqummiuppai.
Nunatta Nakorsaanerata aamma allagaatinik toqqorsivimmini misissuinermini ilaatigut paasivaa 1970-ip naanerani arnat 3821-t spiralimik atuisimasut, tassa arnat 15-iniit 49-nut ukiullit 46 procentii.
Aammattaaq nalunaarusiami allassimavoq 1966-imiit 1975-imut arnani 15-it 45-illu akornanni ukiulinni, agguaqatigiissillugit arfineq-marluk pallingajallugit meeqqisarnermiit, agguaqatigiissillugit 2.4-nik meeqqisarnermut apparsimasoq.
Arnat pineqartut 2022-imi maajimiit misigisaminnik Nunatsinni Nakorsaaneqarfimmut nalunaarutiginnissinnaanngorput, 2023-llu naanerani nalunaarutit 161-it tiguneqarput, nakorsaaneqarfik ilisimatitsivoq, paasissutissallu ilisimatusartunut suliamik annertuumik misissuisussatut Danmarkip Kalaallit Nunaatalu ataatsimoorlutik pilersitaannut ingerlateqqittarpai.
Kannguttaatsuliortoqarsimasoq qularutissaanngilaq
Nakorsaaneqarfiup paasissutissanik saqqummiussineranut atatillugu ilisimatusartut nalunaarusiaat utaqqiinnarniarnagu Naalakkersuisut ilisimatitsipput.
Ilisimatuuni sulineq Naalakkersuisunit iluarisimaarneqartoq, massakkulli spiralilersuisimaneq pillugu qulaajaanermi alloriartoqarnissaa pisariaqartinneqartoq, Naaja H. Nathanielsen oqarpoq:
- Tamanna pissutigalugu suliap inuit pisinnaatitaaffiinut tunngasortaanik qulaajaanissaq Naalakkersuisut aallartinniarpaat. Arnat kannguttaatsuliorfigineqarsimanerat Naalakkersuisunit qularutigineqanngilaq, tamannalu arnanut ataasiakkaanut nunamullu tamarmiusunut kingunerluuteqarpoq.
- Qulaajaanermi nunani tamalaani isumaqatigiissutinik unioqqutitsinerit ersarissisinneqassapput, Inuussutissarsiornermut, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq Naaja H. Nathanielsen oqarpoq.