Spiralilersuineq pillugu qulaajaaneq suli aallartinngilaq
Danskit naalakkersuisui Namminersorlutillu Oqartussat ilisimatusartunik qulaajaasussanik spiralilersuineq pillugu qulaajaasussanik isumaqatigiissusiornialeruttorput.
Septembarimi 2022-mi Naalakkersuisut aamma danskit naalakkersuisui spiralilersuisimaneq pillugu suliaq misissussallugu tunngaviusussamik isumaqatigiissuteqarput, tassani kalaallit niviarsiaqqat arnallu tuusintikkaat spiralilersorneqarput – ilaat akuersitinneqaratik.
Suliaq ilungersunartoq pillugu misissuinermut tunngaviusussami oktobarimi 2024-imi piareerneqarnissaa siunniunneqarpoq, kisianni tamanna pinavianngilaq.
Misissuinermut tunngavissap isumaqatigiissutigineqarnerata kingorna Danmarkimi Folketingimut qinersisoqarpoq, tamatumalu suliat amerlasuut uninngatippai.
Ilisimatusartut qulaajaanermik suliaqartussat qanittukkut inissinneqarnissaat, danskit Indenrigs- og Sundhedsministeriaata neriuutigalugu Sermitsiaq.AG-mut ilisimatitsissutigaa:
Isumaqatigiissusiornermit ukiut marluk suliaqassasut
- Indenrigs- og Sundhedsministeriet aamma Peqqissutsimut Naalakkersuisoqarfik ilisimatusartunik qulaajaasussanik qanittukkut isumaqatigiissuteqarnissaat naatsorsuutigaarput, ministereqarfik allakkatigut akissuteqarluni allappoq.
Qulaajaaneq isumaqatigiissuteqarnermit ukiuit marluk qaangiunneranni piariissasoq, ministereqarfik nangilluni allappoq.
Tassa imaappoq, qulaajaaneq siusinnerpaamik upernaakkut 2025-mi piareerneqassaaq.
Spiralilersuisoqarnerani arnat 13-it sinnerlugit ukioqartut 4.500-t tikillugit amerlassuseqartut spiralilerneqarsimapput, niviarsiaqqat angajoqqaavinit aamma akuersititseqqaarnani pisarsimapput, danskit naalakkersuisuisa 1966-imit 1975-imut naartunaveersaartitsinermut periusissaanut tamanna ilaavoq.
Qulaajaanerit amerlanerusut suliarineqassasut
Spiralilersuineq pillugu qulaajaaneq, Kalaallit Nunaata 1953-imi nunasiaataajunnaarnerata kingorna pisunik marlunnik qulaajarneqartussat ilagaat, tamanna Naalakkersuisut danskit naalakkersuisuilu isumaqatigiissutigaat.
Qulaajaanerup aappaa Kalaallit Nunaata Danmarkillu Sorsunnersuup kingorna attaveqarnerannik oqaluttuarisaanermik qulaajaanerussaaq. Tassani Naalakkersuisut siulittaasuat Múte B. Egede (IA), januaarimi nalunaaruteqarpoq, suliarisassat allassimaffiat upernaap ingerlanerani piareerneqassasoq.
Tamatuma saniatigut Inatsisartut siorna aamma Kalaallit Nunaata nunasiaataajunnaarnerani eqqortumik pisoqarsimanersoq qulaajarneqassasoq akuersissutigaa. Qulaajaaneq taanna qulaajaanerit marluk piareernissaannut kinguartinneqassasoq, Naalakkersuisut siunnersuutigaat. Siunnersuut taanna upernaakkut ataatsimiinnermi suliarineqassaaq.
Spiralilersuineq tamakkiisumik uani paasisaqarfigiuk.