Sorsuttoqarnerata nalaani ukiakkut ataatsimiinneq
Nunarsuarmi politikkimi suna inissisimaffigaarput? Ukiakkut ataatsimiinnermi apeqqutit oqaluuserineqartussat taanna ilagaat. Kisianni aamma nattorallit saassussiumatuut, viinnik aappaluttunik tikisitsisarneq minnerunngitsumillu innuttaasunut atugarliortunut ukiuunerani ikiuutissat ullormut oqaluuserisassaniipput.
Ukiakkut ataatsimiinneq aallarnerniarlugu politikerit tallimanngorpat assuataaqalutik naalagiaqatigeereerunik Inatsisartunut ingerlaaqatigiissapput. Immikkoortut 174-it ullormut oqaluuserisassaniipput, ataaserli ilaanngilaq: Namminiilivinnissaq.
Aviisi AG taama allappoq.
Tunngaviusumik inatsisissaq pillugu isumalioqatigiissitap suliai naammassingajalissasut ilimagisariaqaraluartoq, qinikkanit 31-nit pingaartitaq taakkunaniitinneqanngilaq. Tassami isumalioqatigiissitaq imaluunniit tunngaviusumik inatsisissaq oqaatsimik ataatsimiilluunniit eqqaaneqanngillat.
Taarsiullugu politikerit nunat tamalaat akornanni pisut angisuut pileruttorneranni pissutsinut qaninnerusumiittunut aaqqiissutissarsiorniarput.
Akit Ukrainemi sorsunneq nukissiuuteqarnikkullu ajornartoorneq pissutaallutik qaffakkiartupiloorput, Aningaasaqarnermullu Naalakkersuisoq, Naaja H. Nathanielsen (IA) naapertorlugu, suliniutissanik ilaqutariinnut pissakinnerusunut mianernarnerpaamillu inissisimaffeqartunut ikiorsiissutaasinnaasunik nassaarniarluni Namminersorlutik Oqartussat napasuliaanni tamaviaarluni sulisoqarpoq.
Nalunaarutigineqartut naapertorlugit pilersaarut sapaatip-akunnerata siuliani saqqummiunneqartussaasimagaluarpoq, kisiannili utaqqisitsilluni. Nunani allani tamani pisut assigalugu politikerit nassuerutigisariaqarunarpaat, ajornartoornermi ikiorsiissutinik, aningaasat nalikilliartornerannik pitsaaliuisussanik tamatumalu peqatigisaanik annertunerulersitsisussaanngitsunik, katiteriniarneq ajornakusoortuusoq.
Ullut ataatsimiiffiusut pingajussaanni, marlunngorpat, partiinit ataatsimiinnermi suliassat pingaarnersaat, aningaasanut inatsisissamik katiterineq, aallarteriissavaat. Taanna innuttaasunut tunissutinik angisuunik imaqanngilaq, tamatumali akerlianik amigartooruteqangaatsiarnissamik siunniussaqarfiusimalluni.
Nuummi ullut ataatsimiiffissatut pilersaarutigineqartut 27-t ingerlaneranni innuttaasunit suut allat ilimagineqarsinnaappat?
Aviisimi AG-mi atuarnerusinnaavutit. Aviisi uani pissarsiariuk: