Politikki
Søren Espersenip Nunarput sakkortuumik isornartorsioqqippaa
- Kalaallit Nunaata siuttuisa piviusoq soqutiginngilluinnarpaat, politikeri akerleriiffiusartoq ilaatigut oqallissaarummini taama oqarpoq.
- Ingerlaannaq oqaatigereerniarlara: Danmarkimit ukiumut naalagaaffimmiit tapiissutit pineqartanngitsuuppata Kalaallit Nunaat aningaasaqarnikkut napasinnaanngilaq.
Dansk Folkepartimeersoq Søren Espersen, Jyllands-Postenimi oqallissaarusiamini taama aallarniuteqarpoq.
Kaallit Nunaanni Aningaasaqarnikkut Siunnersuisoqatigiivisa ukiut qulit aqqaneq-marlullu akornanni aningaasanut missingersuutini 1 milliardit koruuninik pitsanngoriartitsisoqarnissaa naatsorsorsimagaam taassuma erseqqissarpaa.
- Aningaasarparujussuit - pisortani soraarsitsiortornerujussuarnik malitseqartussaq, imaluunniit Danmark nunani tamaalaani aningaasanik taarsigassarsiortilerlugu. Ingammik ukiuni arlalinni aningaasaqarneq iluarsineqarsinnaanngeriasaassagaluarpat.
Piviusoq soqutiginngikkaat
- Tamanna tunngavigalugu Kalaallit Nunaanni Naalakkersuisut aamma Inatsisartut aaqqissuusseqqinnissarujussuarnut piareersarlutik ulapinnissaat naatsorsuutigineqarsinnaavoq, ingammik ilinniartitaanermut aaqqissuussaq sumiginnarneqarluinnarsimasoq - kiisalu inuussutissarsiornermut aaqqissuusseqqinnissat, maanna kalaallit politikkikkut aqutsisuisa aatsitassarsiornissamit aningaasarpassuit qaangiuttut paasereernerisa kingorna. Kisianni taamaanngilaq. Kalaallit politikerit tamakkununnga piffissaqanngillat, Søren Espersen allappoq.
'Kalaallit Nunaata aqutsisuisa piviusoq soqutiginngilluinnaraat', taanna isumaqarpoq.
- Namminiilivinnissamik oqalunneq kalaallit inuiaqatigiit atugarissaartuunerisa pitsaassusaanut ajortisaarisuulluinnarpoq, aamma piviusumit qimarratiginninneruvoq, allanillu sinnerinik toqqorterinerulluni.
Inuiaqatigiinnut ajortisaarisuulluinnartoq
- Kalaallit politikerit amerlanerpaartaasa - tamanna nalunngilara - atugarissaassusermut ulorianartorsiortitsisoq nalunngikkaat, kisianni alaannartarpaat. Nuna naalagaaffimmit tapiissuteqarluni akiliisinnaassanngikkuni, aningaasatigut missingersuutit annertuumik pitsanngortinneqartariaqartut nalunngilaat, illuanik persuarsiorlutik oqalugiaannartarput, Søren Espersen oqarpoq.
Naggataatigullu ilanngullugu oqarpoq:
- Namminiilivinnissamik oqallinneq naatsumik oqaatigalugu kalaallit atugarissaassusaasa pitsaassusaannut ajortisaarisuuvoq, piviusumillu qimarratiginninnermut takussutissaannaalluni.