Soraarsitsinerit ima akeqarsimapput

Inatsisartunut marsip 12-ani 2013-imi qinersisoqareernerata kingorna Namminersorlutik Oqartussani pisortat tallimat soraarsinneqarput, naak pisortat taakkua atorfimminnut atatillugu pisussaaffimminnik sumiginnaasimanngikkaluartut.

Tamanna aningaasaqarnermut aatsitassanullu naalakkersuisup, Demokraatineersup Anda Uldumip, Inuit Ataqatigiinnersup Aqqaluaq B. Egedep paragraf 37 naapertorlugu apeqqutaanut akissuteqaatani takuneqarsinnaavoq.

Soraarsitsinerillu taakkua tallimat inuiaqatigiinnut katillugit 7,6 millioner koruunit missaannik naleqarsimasut, Anda Uldum ilisimatitsivoq.

Atuaruk: Svend Hardenbergip atorfimminit soraareernermi kingorna ima amerlatigisunik aningaasanik tunineqassaaq

Qinersivimmi 2013 - 2014 pingasut soraarsinneqartut
Anda Uldummip paasissutissiinera naapertorlugu Namminersorlutik Oqartussani atorfilittat soraarsinneqarsimasut nalunaarsorneqarsimanngillat.

Taamaattorli paasissutissiivoq 2013-imiit maannamut Namminersorlutik Oqartussat naalakkersuisoqarfiini, pisortaqarfiini aqutsisoqarfiinilu pisortat atorfinitsitaanerminnut atatillugu pisussaaffimminnik sumiginnaaneq pissutiginagu soraarnerminnik nalunaarfigineqarsimasut naatsorsorneqarsimasut.

Matumanilu Namminersorlutik Oqartussanit pisortanut pingasunut, qinigaaffimmi 2013-imiit 2014-imut soraarsinneqrsimasuni, aningaasartuutigineqarsimasut 4 millioner koruunit missaaniissasut naatsorsorneqarsimavoq.

Atuaruk: Naalakkersuisoqarfimmi pisortaq alla aamma tunuartoq

Marluk 2014-imi qinersisoqareersoq soraarsinneqarput
Anda Uldummip Aqqaluaq B. Egedemut akissuteqaataani aamma erserpoq pisortat marluk Inatsisartunut 2014-imi qinersisoqareernerata kingorna soraarsinneqarsimasut, qinigaaffimmi 2013-imiit 2014-mut soraarsitsinerit assigalugit pisortat pisussaaffimminnik sumiginnaasimanngikkaluartut.

Pisortanullu soraarsinneqartunut taakkununnga marlunnut Anda Uldummip paasissutissinnera najoqqutaralugu aningaasartuutigineqartut 3,6 millioner koruunit missaanut naatsorsorneqarsimapput.