Inatsisartut
Soraarnerussutisiaqarnissamut aaqqissuussinermut pinngitsoorani ilaanissaq oqaluuserineqalersoq
Inuit amerlanerusut utoqqalinissaminnut Naalakkersuisut sipaartittalerusuppaat
Innuttaasorpassuit pensionisiaqarnissamut aaqqiissummut soraarnerussutisiassat saniatiugut ilaanngillat. Naalakkersuisut tamanna allanngorniarlugu kissaatigaat.
Randi Vestergaard Evaldsen (D), aningaasaqarnermut naalakkersuisuusoq, utoqqalinissamut amerlanerusut ileqqaartalernissaannut peqataasussamik siunnersuummik saqqummiussivoq.
Nunatsinni tamakkiisumik soraarnerussutisinissamut sipaagarisagut tamatigoortumik appasippallaarput, taanna tunngavilersuutimini allappoq.
Atuaruk: Siusinaartumik sulisinnaajunnaarnersiutillit sulilissapput
Soraarnerussutisiaqarnissamut aaqqissuussinermut akiliisarnissaq
- 2013-imi soraarnerussutisianut sipaarutigisanik innuttaasut 400 millionit koruunit ataatilaarlugit akiliutigaat. Naalagaaffitta isertitaasa tamarmiusut 2 procentiisa assigaat. Nunanut, soorlu Danmarkimut, Savalimmiunut Islandimullu naleqqiullugu malunnartumik appasinneruvoq. Nunani taakkunani pineqartuni naalagaaffiit isertitaasa tamarmiusunit 2013-imi akiliutaasut tassaapput 6 procentit, 8 procentit aamma 6 procentit.
Kikkut tamarmik tapeeqataassapput
Inatsisissatut siunnersuutip imaraa, inuit tamarmik 18-nik ukioqalereersimasut Nunatsinnullu tamakkiisumik akileraartussaatitaasoq, soraarninngornissani tikillugu soraarnerussutisiaqarnissamut aaqqissuussinermut akiliisassasoq.
Taamaattorli inuit ukiumut 100.000 koruunit ataallugit isertitaqartut, pinngitsooratik soraarnerussutisiaqarnissamut aaqqiissummut akiliisarnissamut ilanngunneqannginnissaat siunnersuutigineqarpoq.
Atuaruk: Akileraarusiineq pillugu inatsisissap allanngortinneranut nangaassuteqarneq
Ullormut oqaluuserisassat allat
Inatsisartut pingasunngornermi ataatsimiinnerat peqqissutsimut aamma nunani avannarlerni suleqatigiinnermut naalakkersuisup Doris Jakobsenip (S) akunneq ataatsimi apeqqarissaarfigineqarneranik aallartissaaq.
Ullormi ataatsimiiffiusumi Qitiusumik Suliffeqarfinnik Nalunaarsuiffimmi Nunatsinni suliffeqarfiit nalunaarsorneqartalissanersut oqaluuserisassat kingullersarissavaat.
Atuaruk: Aapparisap isertitai apeqqutaatinnagit utoqqalinersiat