Soraarnerussutisianut nassuiaat utoqqaat illersuisuannit akerlilerneqartoq

Nunami maani isertitat agguaqatigiissillugit appasinnerutillugit, soraarnerussutisiat Danmarkimit pitsaanerunerarneqarsinnaanngillat. Utoqqaat illersuisuat Helene Heilmann oqarpoq.

Isumaginninnermut Naalakkersuisup Martha Abelsenip Kalaallit Nunaanni soraarnerussutisiat danskit soraarneussutisiaannit pitsaanerunerarsinnaanngilai. Taamatut oqarpoq, utoqqaat illersuisuat Helene Heilmann, Naalakkersuisup tusagassiortunut nalunaarutearnermini oqaaserisai sakkortuumik isornartorsioramigit.

- Danmarkimi isertitat agguaqatigiissillugit Kalaallit Nunaanninngarnit qaffasinnerujussuupput, taamaammallu assersuussilluni tunngavilersuutigineqartut Kalaallit Nunaanni utoqqalinersiutit danskit utoqqalinersiutaannit qaffasinnerunerarneqarsinnaanatik, Utoqqaat Illersuisuat Helene Heilmann oqarpoq.

Isumaginninnermut Naalakkersuisup Aqqaluaq B. Egedep paragraf 37 naapertorlugu apeqqutaanut akissuteqarnermini ilisimatitsissutigaa, Danmarkimi utoqqalinersiutit nunami maani utoqqalinersiutinit annertunerungaluartut, isertitat agguaqatigiissinneqarneranni nunami maani naleqarnerusut.

Pissarsiffik: Martha Abelsenip Aqqaluaq B. Egedemut akissutaa.

Taamatut oqaaseqarsimanera utoqqaat illersuisuat isumaqatiginnilluinnarpaa:

- Kisitsisit saqqummiunneqartut takutiinnarpaat, Danmarkimi utoqqalinersiutit Kalaallit Nunaanni qaffasinnerunerat, utoqqaat illersuisuat oqarpoq.

Inuuniutissat puigorneqassanngitsut

- Inuuniutissat aamma Danmarkimi inuuniutissanut sanilliullugit Kalaallit Nunaanni qaffasinnerujussuupput, ilaatigullu tamatumunnga atatillugu Kalaallit Nunaanni ineqarnermut, nerisassanut angalanermullu akigitinneqartartut qiviaannarlugit tamanna takuneqarsinnaavoq, utoqqaat illersuisuat oqarpoq.

- Taakku tunngavigalugit oqartoqarsinnaanngilaq, Kalaallit Nunaanni utoqqalinersiutit Danmarkimi utoqqalinersiutinit qaffasinnerusut. Akerlianik kisitsisit saqqummiunneqartut takutiinnarpaat, Kalaallit Nunaanni utoqqalinersiutit Danmarkimi utoqqalinersiutinit appasinnerusut, Helene Heilmann oqarpoq.

Utoqqaat Illersuisuata oqaatigaa, Martha Abelsenip oqaaseqaatai naapertorlugit utoqqaat allatut isertitaqarnissamut periarfissaqanngitsut atugaannik pitsanngorsaanissamut isumaginninnermut naalakkersuisoq pilersaaruteqarpasinngitsoq.

Powered by Labrador CMS