Soraarnerit oqariartuuteqartut: Nuuttarneq ernumanarpoq
Kalaallit 60-it sinnerlugit ukioqartut Danmarkimi najugaqartut, ukiut qulit ingerlanerini amerlassusaat marloriaat qaangerlugu 1.109-nit 2339-nut amerleriarput. Nuummi ilinniartitsisut soraarnerit, suli IMAK-imi ilaasortaaffeqartut tamanna ernumassutigaat.
Nuummi ilinniartitsisut soraarnerit politikkikkut iliuuseqartoqarnissaanik piumasaqarput, taamaalilluni soraarnerit Danmarkimut nuunniarlutik aalajangertartut ikiliniassammata.
Ilaasortat januaarip 28-anni ataatsimiinnerminni soraarninngortut atugassarititaat oqaluuseraat.
Uggornartoq
Soraarnernerit ataatsimut oqariartuummi oqaatigaat, ”taama amerlatigisut soraarninngorlutillu Danmarkimut nuuttarmata Nunatsinnut uggornarpoq.”
- Qularinngilarput pissutsinik allannguisoqaraluarpat amerlasuut nunatsinniiginnarnissartik piumanerussagaluaraat, soraarnerit IMAK-imeersut taama allapput.
Naalakkersuinermik suliaqartut qineqqusaarnerup nalaani suliariniarlugit neriorsuutigisaannik innersuussillutik ujartuipput, ukulu qaqippaat:
- Sooq nuuttoqartarnersoq misissuiffigineqassasoq.
- Soraarnerit sulillattaarusuttut utoqqalinersiaminnik ilanngaavigineqartarunnaassasut.
- Danmakimi ilinniagaqartut nunatsinnut utertarnissaat suliniarfigineqassasoq
- Oqaq naammanngilaq, taakku eqimattat aalajangersimallutik taama oqariartuuteqarput, Marianne Jensen, William Kriegel aamma Fia Kriegel taakkunani ilaapput. Inuit Nunatsinniiginnarnissaannut imaluunniit uternissaannut suut pisariaqartinneqarnerinik qulaajaanissaq pingaarnertut tassani piumasarineqarpoq.