Soomi passit kalaalerpalunnerugunik?: »Ilisarnaat pingaarutilik – tulluussimaarutissarlu«
Maanna danskit naalakkersuisuisa akisussanngorpaat sooq Kalaallit Nunaat Savalimmiullu assigiinngisinneqarnersut.
Sooq kalaallit rubiiatut aappaluttumik EU-passeqassappat Savalimmiormiut qorsummik passeqartut?
Apeqqut taanna Danmarkimi inatsisinik atuutsitsinermut ministerip Mattias Tesfayep (S) akisussanngorpaa. Folketingimut ilaasortaq Aaja Chemnitz Larsen Inuit Ataqatigiinneersoq danskit naalakkersuisuinut saaffiginnippoq, aviisi AG allappoq.
- Savalimmiormiut passiat immikkuullarippoq assersuutigalugu danskit kalaallillu passiannit allatut qalipaateqarami. Tamatuma saniatigut Savalimmiormiut passianni paasissutissaqarpoq inuk taanna Savalimmiormiusut danskisullu innuttaassuseqartoq, Aaja inatsisinik atuutsitsinermut ministerimut allappoq nangillunilu:
- Nunatsinnisuut Savalimmiuni innuttaasut namminneq toqqarsinnaavaat nunagisaminnit imaluunniit Danmarkimit passeqassanerlutik. Ministerip oqaatigisinnaanerlugu Savalimmiuni inuit qassit Savalimmiormiusut passeqarnersut? Kalaallisut passitaartoqasinnaava allassimalluni kalaallisut danskisullu innnuttaassuseqarluni? Mattias Tesfaye aperaa,
aasaanerani sulinngiffeqareernerup kingorna suliami paasiniaareersimasussaq.
Ilisarnaat
AG-mit Aaja Cheminitz Larsen aperineqarpoq passimik kalaalerpalunnerusumik peqarneq sutigut allaanerussuteqassanersoq.
- Innuttaassuseqarneq ullumikkut danskiusoq oqaluuseriuartarparput, inuppassuillu siunissami
kalaallisut passeqarusupput. Kalaallisut passeqarneq inuppassuarnut ilisarnaataavoq pingaarutilik tulluusimaarutaasorlu, akivoq.
Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk: