Sømandshjemmi sanaartornissarsuarmik pilersaaruteqartoq
Nuummi Sømandhjemmi ineqarfinnik marlunnik, ataatsimeersuarfimmik sømandshjemmemillu ingerlatsisup inissaanik sanaartorniarluni pilersaaruteqarpoq
Aappariit Ulla og Jacob Tindalíð Nuummi Sømandshjemmemik ukioq ataasiinnaq ingerlatsisooreerlutik Sømandshjemmemimik alliliinissamut piareersimapput.
Kommuneqarfik Sermersuumi Sanarfinermut Avatangiisinullu Ataatsimiititap kommunimut pilersaarummut tapiliussaq, Sømandshjemmip eqqaani ineqarfinnik, ataatsimeersuartarfimmik ingerlatsisullu inissaannik sanaartornissamut qulakkeerinnittussaq ullumi isummerfigissavaa.
Sanaartorfissat pingasut
Ingerlatsiviup Sømandshjemmip eqqaa sanaartorfissanut pingasunut agguarsimavaa, tassani quleriiaat sisamat, pingasut marlulluunniit sanaartorneqarsinnaallutik, taakkunani init naqqarleriit quleriiaat siulliattut atuutissaspput, tamanna sanaartornermut ataatsimiititami politikkerinut saqqummiussisoqarmat takuneqarsinnaavoq.
- Nuummut takornariartartut amerliartorput illoqarfillu ineriartorluni. Taamaammat illoqarfimmi akunnittarfiit neriniartarfiillu annertusarneqarnissaat pisariaqartinneqaraluttuinnarpoq. Nuummi Sømandshjemmip kangiata tungaaniittoq umiarsuarnik takornariartartut talittarfiat Nuummi takornarianit atorluarneqarpoq. Timmisartoqarfimmik alliliinerup, taassumalu sunniutigisaanik naatsorsuutigineqarpoq, takornariat siunissami suli amerliartussasut, nassuiaammi taama allassimasoqarpoq.
Nassuiaammi aamma allassimasoqarpoq, Sømandshjemmip inissisimaffiata eqqaa inuussutissarsiutinut allanut atorneqarsinnaasoq.
- Sumiiffimmi nutaanik sanaartortoqarsinnaanera periarfissinneqarpoq, kiisalu atuutereersut allilerneqarnissaat/ ilassutitut sanaartorfigineqarnissaat/ allanngortinneqarnissaallu periarfissinneqarluni. Sanaartukkat akunnittarfittut, ataatsimeersuartarfittut, neriniartarfittut, upperisaq tunngavigalugu ikiuisarfittut ajoqersuisarfittullut aamma allatut isiginnaartoqarluni aliikkusersuisarfittut kiffartuussivittut kiisalu initut ataasiakkaatut aaqqissuunneqarsinnaapput. Tamakkua saniatigut inuussutissarsiornermi siunertanut naleqqussarneqarsinnaapput, soorlu namminersorlutik inuussutissarsiuteqartunut (ussassaarisartut, IT-kkut suliffeqarfiit, eqqartuussissuserisut, titartaasartut, ingeniørit, illunik tuniniaasartut, naatsorsuuserisut assigisaallu), nakorsiartarfinnut (kigutit nakorsaat, isikkanik tagiartuisartut, tarnip pissusaanik ilisimasallit assigisaallu), kiffartuussisunut. pisortat allaffeqarfiinut assigisaannullu atorneqarsinnaallutik.
Qanoq iluseqarnissaannut piumasaqaat
- Illuutit atuutereersut isaterneqarsinnaanerat allanngortinneqarsinnaanerallu periarfissaavoq, kiisalu nutaanik sanaartortoqarsinnaallunilu sanaartorfissatut aalajangikkat iluini sanaartortoqarsinnaavoq, nassuiaammi allassimavoq.
Aamma piumasaqaataavoq, nutaamik sanaartornermi sanaartukkap ilusaa, sanaartornermi atortut qalipaatillu illumut atuutereersumut naleqqussarlugit sanaartortoqassasoq.
Ataatsimiititaq inassuteqaammik akuersissappat, suliaq Aningaasaqarnermut Inuussutissarsiornermullu Ataatsimiititamut ingerlateqqinneqassaaq, ataatsimiititap kommunimut pilersaarummut tapiliussaq inaarutaasumik akuersissutigissavaa. Tamatuma kingorna sapaatip akunnerisa arfineq-pingasut missaanni tusarniaassutigineqassaaq Kommunalbestyrelsilu ilisimatinneqassalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...