Sømandshjem 50-iliissaaq
Sisimiuni Nuummilu Sømandshjemmet ukiuni 50-inngortorsiorlutik nalliussineqassapput. Ullut nalliuttorsiorfiit Sømandshjemmemi kaffellerfiussapput aliikkusersuisoqassallunilu.
Sisimiuni Sømandshjemme juulip 26-ani kaffellissaaq innuttaasunullu nalliuttorsiortitsissalluni, Nuummilu juulip 30-ani kaffellertoqassalluni.
Sømandshjemme tusagassiutinut nalunaaruteqarluni taama allappoq.
- Kalaallit Nunaanni akunnittarfinni Sømandshjemmet pisoqaanersaapput. Taakkunani akunnittut “angerlarsimaffimmut” allamut isertutut misigisarsinnaapput, ataqatigiittoqarpoq silaannarlu nuannersuulluni. Neriniartarfeqarpoq, isersimaartarfeqarlunilu, akunnittullu tassaakkajupput umiartortut, illoqarfimmi najugaqartut takornariallu, Sømandsmissionen tusagassiutinut nalunaarummi allappoq.
Sømandshjemme siulleq
Taamani Godthåbimik Sømandshjemme siulleq sananeqartussaasimagaluarpoq. Sømandshjemmeli siulleq Sisimiuni, taamani Holsteinsborgimik pisagaanni, sananeqaqqaarpoq, juulillu 26-ani 1969-imi ammaanersiorneqarluni.
Qeqqata Kommuniani borgmesterip, meeraanerminit Sømandshjemme eqqaamasaqarfigilluarpaa.
- Meeranninniilli takusarsimavara sømandshjemme illoqarfitsinnut qanoq pingaaruteqartigisoq. Meeraanera tamaat sømandshjemmep tunuani najugaqarpunga, tassanngaanniillu takusarlugit sanasut sømandshjemmemi ullaakkorsiortut. Maanna inersimasunngoreerama ilaquttakka ilagalugit sømandshjemmemut qaammammut arlaleriarlunga neriartortarpunga, tamatigullu neriartortut arlaqartuaannarput. Nuannaarutigisarpara sulisut inuiaqatigiinni akisussaaffimmik tigusisarnerat, tassami kisermaanut juullimi nerisitsinernik aaqqissuussisarput aasaaneranilu meeqqanut sammisaqartitsisarlutik. Tamanna pillugu nersualaarneqartariaqarput, Malik Berthelsen (S) tusagassiutinut nalunaarut naapertorlugu allappoq.