Sømandshjemit pingasut ullorissatik tigummiinnarpaat

Hotel Stars Unionimi piumasaqaatinut nutaanut Kalaallit Nunaat ilannguppoq, taamaallilluni akunnittarfiit piumasaqaatinut taakkununnga naammassinnissapput.

Horestamit immikkoortiterinerit Hotel Stars Unionimut kattupput, tamatumalu kinguneraa, ullorissat pilerigineqartut angussagaanni piumasaqaatit amerlanerusut naammassineqassasut.

Ineriartornissamut isumassarsiffissaq
Nunatsinni sømandshjemit tamarmik - Nuummit, Aasianni aamma Sisimiuni - pingasunik ulloriannaqqinnissamut iluatsippoq.

- Atortorissaarutigut aamma kiffartuussinerput ukiut tamaasa ilisimasaqartunit nalilersorneqartarnerisa, najoqqutassiagut nalilersorteqattaartarpagut aammalu ineriartornissamut isumassarsiorfigisarlugit, Nuummi Sømandshjemimi pisortaq, Allan Majholm oqarpoq.

Aasianni allilerineq
Avannaani illoqarfimmi Aasianni sømandshjemi ukiuni sisamani kingullerni ineriartorusaarnikuuvoq, taamaattumillu allilerinissamut pisariaqartitsisoqarpoq, akunnittarfimmi pisortaq Anders Sørensen ilisimatitsivoq.

- Pikkorissartitsinerit annertuumik amerlariarnikuupput, pitsaalluinnartunillu naliliiffigineqartarpugut. Pikkorissartitsinissamik neqerooruteqarnitsinnit tikeraartup kingulliup mittarfiliaanneqarneranut, tikeraartut aggeqqinnissaanut kiffartuussilluarneq aalajangiisuulluinnartoq upperaarput, tusagassiuutinut nalunaarummi oqarpoq.

Marlunnik kisitsisitalimmik millioninik iluarsaassineq
Aasianni ininik qulinik sanasoqarnikuuvoq, akunnittarfittullu inissiat marluk pisiarineqarnikuullutik. Aasianni ilaartorneqarneranut atatillugu suliamut avatangiisinut tunngatillugu pitsanngoriaatissat eqqarsaatigineqarput. Seqinermik innaallagissiuut 26 kW ikkuneqarlunilu 2015-imi atorneqalerpoq.

Sømandshjemit tamarmik ukiut tamaasa aningaasarpassuit atortarpaat, taamaalillutik qaamallutik iseruminarlutillu piniassammata. Ukiut tallimani kingullerni iluarsartuussinernut aamma allilerinernut 25 millionit koruunit missingi aningaasartuutigineqarput.

Atuaruk: Qaqortumi Sømandshjemmi atorunnaartussanngortoq