Socialministeri nunaqarfinnut takuniaassasoq
Naalakkersuisoq Mimi Karlsen (IA) sapaatip-akunnerani matumani Danmarkimi isumaginninnermi utoqqarnullu ministerimik Astrid Kragimit (Soc.) tikeraartoqassaaq. Krag Nuummiillunilu Maniitsumiissaaq, kiisalu nunaqarfiit Atammik Napasorlu tikissallugit.
Danmarkimi ministerit tikeraarnerat sapaatip-akunnerani matumani ingerlaannassaaq. Naalakkersuisoq Mimi Karlsen sapaatip-akunnerani kingullermi Danmarkimi peqqissutsimut ministerimik Magnus Heunickemik tikeraartoqarpoq, tassani spiralilersuisimaneq oqaluuserineqarluni.
Sapaatip-akunnerani matumani suliaq ilungersunartoq alla Danmarkimi ministerilu oqaloqatigiissutigineqassaaq. Matumani pineqarpoq kalaallit-danskit isumaginninnikkut suleqatigiissutaat, tassani meeqqat inuusuttullu atugaannik pitsanngorsaanissaq Danmarkimilu Folketingimit aningaasaliiffigineqarsimaoq qitiutinneqarluni.
Namminersorlutik Oqartussanit ilisimatitsissutigineqarpoq, ullut sisamat ingerlaneranni suliniutit arlallit ineriartortinneqarnerannit atuutsilersinneqarneranniillu allannguutaasimasut pillugit Astrid Krag Mimi Karlsenilu tusagaqassasut. Taakku marluullutik aamma Kommuneqarfik Sermersuumi Qeqqata Kommunianilu Isumaginninnermi pisortat ataatsimeeqatigissagaat.
Mimi Karlsen Astrid Kragimut nunaqarfinnik, Atammik aamma Napasoq, takutitsinissani immikkut qilanaartuutigaa, tassani nunaqarfinni aqutsisut ministerillu naapeqatigiissapput:
- Kalaallit Nunaannut tunngatillugu tamakkiisumik paasinninnissamut nunaqarfimmi inuuneq pillugu paasinninnissaq pingaaruteqarpoq. Nunaqarfimmi inuuneq ataqatigiilluarnermik pinngortitamillu ataasioqatigiinnermik takutitsisuuvoq. Kisianni aamma qallunaat aaqqiissutaat Kalaallit Nunaannut assiliniarneqartarnerisa sooq tamatigut ajornanngitsuinnaasannginnerat pillugu paasinnilersitsisinnaavoq, taama oqarpoq Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen.
Ministerimik tikeraartoqarneq ministerit akornanni ataatsimeeqatigiinnermik naggaserneqassaaq, tassani tikeraarnerup nalaani ilisimalersimasat kiisalu sulinerup ingerlateqqinnissaa oqallisigineqassapput.