Folketingi
Socialdemokraatit aamma Aleqa Hammond suleqatigiunnaarpaat
Siumup Aleqa Hammondimik suleqateqarunnaarnerata kinguneraa, socialdemokraatit folketingimi gruppimut suleqataasinnaajunnaarneq
Kreditkortimik suliap kingorna Aleqa Hammond marlunngornermi Siumumi ilaasortaajunnaarsinneqarpoq, kreditkort Folketingimit tunniunneqartoq atorlugu 12.983 koruuninut pisiniutigisimagaa suliami saqqummiunneqarpoq.
Tamatuma kingorna Folketingimi attaviitsutut ingerlaqqinniarluni aalajangerpoq.
Aleqa Hammond Siumumit anisitaannginnermini Socialdemokraatit gruppianniikkaluarpoq. Kisianni Socialdemokraatit tunuliaqutsiiumajunnaarput.
Atuaruk: Aleqa Hammond: Peqquserlunniarsarinngilanga
Siumumi ilaasortaasariaqartoq
- Unnummut (marlunngornermi, aaqq.) ilisimatinneqarpunga, partiip Kalaallit Nunaanni suleqatitta, Folketingimi ilaasortamik Aleqa Hammondimik suleqateqarnertik taamaatissimagaat, Aleqa Hammondillu attaviitsutut Folketingimi ingerlaqqinniarluni nalunaarutigigaa, Socialdemokraatit gruppimi siulittaasuat Henrik Sass Larsen DR.dk-mut marlunngornermi unnukkut oqarpoq.
Atuaruk: Aleqa Hammond Siumumit peersitaavoq
- Taamaammallu aamma socialdemokraatit gruppiannit anissaaq, tassani ilaasortaaneq Siumumi ilaasortaasariaqarnermik piumasaqaateqarmat, Henrik Sass Larsen DR-imut oqaaseqarluni allappoq.
Atuaruk: Aningaaserivik: Sapaatip-akunneri pingasuni utaqqineq nalinginnaanngilaq
Atuaruk: Siumut Aleqa pillugu suliamut akuersaanngilaq