'Nunatsinnut iluaqutissat'

Soc. Namminersorlutik Oqartussat sulilluarnerat tatigaa

Namminersornermut Inatsip tunaartai atoraanni Kalaallit Nunaanni ajunngitsumik ingerlatsisoqassasoq Socialdemokraatit oqaaseqartartuat oqarpoq

- Ikiueqataarusuppunga naligiittut inissilluta, Kalaallit Nunaannut tunngasunut oqaaseqartartoq Flemming Møller Mortensen Socialdemokratit oqarpoq

Socialdemokratinit akuuffigineqarnianngilaq Kalaallit Nunaat namminiilivissanersoq namminiilivissannginnersorluunniit.

Kalaallit Nunaat namminiilivinnissaa aatsitassarsiornissaalu pillugu nalunaarusiap saqqummiunneqareerneranni Socialdemokratit oqaaseqartartuat Flemming Møller Mortensen Ritzau-imut oqarpoq.

- Isumaqarpunga nalunaarusiaq saqqummiunneqartoq tusaatissatut tigussagaat, soorlu nalunaarusiat misissuinerillu allat aamma tusarsaatissatut tigusaraat.

- Ikiueqataarusuppunga naligiittut inissillunga. Namminersornermut Inatsip tunaartai atorlugit sulisoqassasoq neriuutigaara, tassani siunissamut isigisumik sulisoqarnissaa neriuutigalugu, Kalaallit Nunaat pillugu oqaaseqartartoq oqarpoq.

Naalakkersuisut Siulittaasuata arlaleriarluni naqissusereerpaa Kalaallit Nunaat namminiilivikkumaarnera.

Nalunaarusiamili erserpoq, Kalaallit Nunaat Danmarkimit ukiumut tapiissutigineqartartunut isumalluuteqarunnaassaguni namminerlu aningaasatigut napatissaguni aatsitassarsiorfinnik angisuunik 24-nik ammaanissaa pisariaqassasoq.

Maannakkumut aatsitassarsiorfinnik marlunnik ammaasoqarnissaa pilersaarutigineqarpoq, ammarnissaannulli suli aningaasaliisoqanngilaq.

Dansk Folkepartimit oqartoqarpoq Kalaallit Nunaata namminiilivinnissamut eqqarsaatai unitsinneqartariaqartut, naalagaaffeqatigiinnilu ataannarnissaa siunertarineqartariaqarluni.

Taamali oqartoqarnera Flemming Møller Jensenip akerlilerpaa.

- Dansk Folkeparti taama oqarnerminut Namminersornermut Inatsit ataqqinngilaa. Namminermi Inatsisartut namminneq suliassaannik oqartussaaffinnik angerlaassaqareerpoq.

- Soorunami oqallittassaagut siunersortarlutalu. Siunersuutilli inatserpalaartuuppata assigiinnassavaa soolu qatanngutigiinni angajulliup nukkani oqaluukkaa, tamannalu Socialdemokratinit akuerisinnaanngilarput, S-imi oqaaseqartartoq oqarpoq.

Powered by Labrador CMS