Smileynik aaqqissuussineq amerlanerusunik ilinniartoqartitsilissaaq

Smileyt aappaluttut, sungaartut, qorsuit niaqorutaasartallilluunniit takutissinnaalissuaat, pisortat suliffeqarfiillu ilinniartunik ilinnianermullu atatillugu suliffimmiittunik atorfinitsitsinissamut suliffeqarfiit oqartussalluunniit qanoq pitsaatigisumik ingerlatsinersut.

Nalunaarut aaqqissuussamik atuutsitsilertussaq Naalakkersuisut tusarniaassutigalugu nassiuteqqammerpaat.

Nalunaarut suliffeqarfiit pisortallu ilinniartunik ilinniarnermullu atatillugu suliffimmiittunik atorfinitsitsinermikkut inuiaqatigiinnut akisussaaffeqarnerat pillugu inatsimmit tunngaveqarpoq. Inatsit 2020-mi ukiakkut Inatsisartunit akuerineqarpoq. Inatsimmi siunertarineqarpoq, suliffeqarfiit oqartussallu ilinniartunik ilinniarnermullu atatillugu suliffimmiittunik amerlanerusunik atorfinitsitsisarnissaat.

Smiley niaqorutaasartalik

Sulisoqarnermut Naalakkersuisoqarfik tunngaviit uku aallaavigalugit smileymik qorsummik, sungaartumik, aappaluttumik imaluunniit smileymik niaqorutaasartalimmik tunniussisinnaavoq.

Suliffeqarfiup oqartussalluunniit:

1. - ilinniarfiit tamakkununnga attuumassuteqartut ilinniarfittut ilinniarnermullu atatillugu suliffimmiiffittut akuerineqarnissaq siunertarlugu attaveqarfiginikuuaat.
2. - ilinniakkat sammiviini ataasiakkaani qanoq amerlatigisunik ilinniartoqarnissamik ilinniarnermullu atatillugu suliffimmiittoqarnissamik qitiusumik ilinniarfimmit akuerineqarsimanertik nalunaarsornikuuaat.
3. - ilinniakkat sammiviini ataasiakkaani ilinniartunik ilinniarnermullu atatillugu suliffimmiittunik qanoq amerlatigisunik sulisoqarsimanerlutik aamma ilinniarfik ilinniarnermullu atatillugu suliffimmiiffik kommunimi sorlermi inissisimanersoq nalunaarsornikuuaat.
4. - Sulisoqarnermut Naalakkersuisoqarfiup atorfiit pillugit nittartagaani (www.suli.gl) atorfinnut tamanut takuneqarsinnaasumik inuttassarsiuinikuupput.
5. - ilinniartut ilinniarnermullu atatillugu suliffimiittut amerlassusaat akuerineqaatigisatik tamakkerlugit atorfinitsitsinikuupput.

Piumasaqaatit suliffeqarfiup oqartussalluunniit naammassisimasaasa amerlassusaat naapertorlugit smileyp qanoq qalipaateqarnissaa aalajangiunneqartassaaq, tassa suliffeqarfik piumasaqaatinik tamanik naammassinnissimasoq smileymik qorsuusumik niaqorutaasartalimmik tunineqassaaq.

Akerlianik suliffeqarfik piumasaqaatit arlaannaannilluunniit naammassinninngitsoq smileymik aappaluttumik tunineqassaaq.

Suliffeqarfik smileymik pitsaanngitsumik tunineqartoq, naalakkersuisoqarfimmut nassuiaateqarnissamut periarfissaqartinneqassaaq.

IA akerliulluni taasisimasoq

Maanna naalakkersuisooqateqartut Inuit Ataqatigiit inatsisissaq smileymik aaqqissuussamik imaqartoq Inatsisartuni suliarineqarmat akerliullutik taasisimapput. Siumut, Demokraatit Nunattalu Qitornai inatsisissamut akuersisimallutik.

Inuit Ataqatigiit inatsisip suliffeqarfiit inuusuttullu ilinniagaqartut akornanni ajornartorsiutaasartunik aaqqiissuteqarsinnaanersoq qularisimavaat, tassa suliffeqarfiit ilinniartunik ilinniarnermullu atatillugu suliffimmiittunik atorfinitsitsinissamut piumasaqaatinik naammassinnissimanngitsut tamanut saqqummiunneqarnerisigut aaqqiissutaasinnaanera qularisimagamikku.

Partiimittaaq suliffeqarfinnut oqartussanullu piumasaqaatinik naammassinnissimanngitsunut tamanna qanoq kinguneqartinneqartassanersoq takuneqarsinnaasimanngilaq, oqaatigaallu aaqqissuussaq suliffeqarfiit allaffissornerulernerannik nassataqassasoq.

- Nunami maani suliffeqarfiuteqarpugut mikisunik arlalinnik, isumaqarpugullu suliffeqarfiit taakku allaffissornerulersinneqarnissaat naammaginaranilu siunertamut naapertuutinngitsoq, pingaartumik piumasaqaatigineqartut sunniutissai matumani qularnartillugit, partiimi Inuussutissarsiornermut Aatsitassanullu Ataatsimiititalimi ilaasortat inatsit pillugu allassimapput.