Slettemarkikkut VM-imi naammassisut: Uniornermi kaajallaaqqinnissaq puigoramiuk akisunaaraa

Sondre Slettemark ooqattaasarluni sisorarnermi Youth VM-imi, malersuulluni unamminermi sapaatiummat 12. marts nr. 22-tut inissippoq. Malersuulluni unamminermi ooqattaanerit 20-usuni tallimariarluni uniorpoq, ajugaasumiillut 3 minutsit 20 sekundillu atorlugit apuuffissamut kingulliulluni apuussimalluni. Ajugaasuuvoq Norgemeersoq Siverth Gerhardsen, Sondre Slettemarkip unammisartagaa. Grønlands Biathlon Forbund tusagassiorfinnut taama nalunaaruteqarpoq.

Sondre Slettemark malersuulluni unamminermi 10 kilometerisut isorartutingisumi, nr. 28-iulluni aallarpoq, unammisallu arfinillit qaangersimallugit nr. 22-tut inissilluni, unammisut 60-it akornanni. Malersuunnermili pitsaanerusumik angusaqarsimasinnaagaluarnini, taassuma ilisimavaa.

- Sisorarnermi pitsanngoriarnera iluarisimaarpara, sukkatsinnerali kingusinaarpasippoq, neriuutigisimagaluarparami VM-imi angusara pitsaanerussasoq. Nr. 22-tut inissinneq ajorisassaanngilaq, uppernarsivarali norskit unamminerini unammillersinnaasakka VM-imi ujaminnassinnaappata, taava tamanna uannut angujuminarsinnaasoq aamma, Sondre Slettemark oqarpoq.

Puigortoornermi pitsaanerusumik inissinnissaq anguneqanngitsoortoq

Ukaleq Slettemark malersuulluni unamminermut aamma annguppoq, sprint 7,5 kiometerimi nr. 42-tut inissikkami. Ooqattaarfissani marluusuni ataasiaannarluni uniorpoq, aallaqqaarnerminilu pitsaanerit 15-t akornaniinnissaa naatsorsuutigineqarsinnaagaluarluni, biathlon forbundet allappoq.

Ukaleq Slettemarkilli ooqattaasarnermi uniornerminit pillaatitut kajaallaaqqilluni ujakkaarnissani puigortoorpaa, tamannalu pillaatitut angusaanut minutsinik marlunnik ilasinermik naleqarpoq. Taamaasilluni nr. 41-tut inissinneqarluni.

Puigortooraluarneq aporfiginagu malersuulluni unamminissamut, sapaammi 12. marts pisussamut, annguppoq. Unamminissalli aallartinnissaanut minutsit 45-nnanngortut tunuartariaqalersimavoq, napparsimaneq pissutigalugu:

- Junior VM-imi uani angusarinnerpaanissara anguniarsimagaluarpara, tamannali iluatsissimanngilaq. Ukioq manna unamminerit arlallit peqataaffigereerpakka, VM-illu ullui kingulliit nallertullu napparsimalerninnut tamanna pissutaasimasinnaavoq, Ukaleq Slettemark oqarpoq nangillunilu:

Norgemi World Cup tullinnguuppoq

- Timersornermi angusinnaasakka tassani sunnertissimasinnaapput. Maanna anguniarpara peqqissilertornissaq, Norgemi Holmenkollenip World Cupimi unamminerit tallimanngorneq 17. marts aallartippata piareersimaniassangama, Ukaleq Slettemark oqarpoq.

Inuk Slettemark Youth VM-imi sprintimi nr. 68-itut apuuppoq, malersuunnermullu anngutinngitsoorluni. Taamaattoq VM-imi peqataarngaarnini pissarsiaqarfiulluartoq taanna isumaqarpoq.