Skatteministeri: Kalaallit Nunaata Danmarkillu akornanni akitsuutit EU-p aalajangertarpai

Nunatsinni aallarnisaasut Danmarkimi atuisunut akitsuummik momsimillu akiliinatik nioqqutissanik tuniniaasinnaasariaqarput.

Folketingimut ilaasortaq Aaja Chemnitz (IA), Kalaallit Nunaannit Danmarkimut nassiussanut akitsuutit aamma momsinut inatsisit pillugit arlalinnik apeqquteqartoq taama isumaqarpoq.

Politikerip oqarnera naapertorlugu suliffeqarfiit arlallit aporfeqarput, nioqqutissaatitik Danmarkimut nassiunneqartillugit momsilerneqarlutillu akitsuuserneqartarmata. Kalaallit Nunaat EU-mut ilaasortaanngimmat tamanna pisarpoq (inatsisit akillu allaaserisap naggataani takukkit).

- Kalaallit Nunaanni suliffeqarfiit arlallit nioqqutissaataannut atuisut momsimik akiliisarmata, taamaattumillu ajornerpaatillugu nioqqutissanik aallertanngimmata, Danmarkimut tuniniaasarunnaarsimasut oqaloqatiginikuuakka, Aaja Chemnitz oqarpoq, nangillunilu:

- Kalaallit Nunaannut immikkut inatsisinik akuersisinnaanngitsut

- Naalagaaffeqatigiippugut, maannakkullu naalagaaffeqatigiit akornanni niuernikkut aporfilersuineq paasiuminaappoq.

Akitsuusersuinermik suliassaqarfik EU-p kisermaassilluni piginnaasaqarfigigaa, Danmarkimi skatteministerip Jeppe Bruusip (Soc.) politikerimut uani sapaatip akunnerani akissuteqarnermini allappoq, taamaattumilu suliassaqarfimmi inatsisit Danmarkip allanngortikkuminaatsippai:

- Nunat EU-mut ilaasortat, Danmark ilanngullugu, suliassaqarfimmi tassani namminersorlutik niueqatigiinnissamut isumaqatigiissusiorsinnaanngillat imaluunniit Kalaallit Nunaata akileraartarnikkut inissisimaneranut immikkut inatsisinik akuersissuteqarsinnaanngillat, skatteministeri taama akissuteqarpoq.

Momsimik akiliisarnermut tunngatillugu tamanna aamma atuuppoq. Kalaallit Nunaanni suliffeqarfiit – suliffeqarfiit EU-p avataaniittut assigalugit – nioqqutissat EU-mut eqqunneqartillugit tunineqartillugillu momsii naatsorsorneqartassasut, skatteministeri tassani ilisimatitsivoq.

Ilungersuutigiinnarniaraa

- Taamaaliornikkut suliffeqarfiit EU-p avataaniittut suliffeqarfinnut EU-miittunut naligiisinneqassapput, taakku aamma Danmarkimi imaluunniit EU-mi niuerfinni tunisaminnut momsinik naatsorsuisarput, akissuteqaammi tamanna allaqqavoq.

Naalagaaffeqatigiinnermi sumiiffiit assigiinngitsut akornanni aporfeqannginnissaanik isumaqartoqarneranut Jeppe Bruus isumaqataalluinnarluni naqissusiivoq, Danmarkillu allannguinissamut periarfissaqaruni allannguutissaasinnaasut misissussallugit piareersimavoq.

Aaja Chemnitzip kalaallit suliffeqarfiinut niuernikkut aporfilersuinertut oqaatigisami, kiisalu inuit nammineq nassiussaannut momsilersuisarnerit akileraarusersuisarnerillu peerneqarnissaannik sulissuteqarnini nanginniarlugu oqaatigaa:

Tunissutinik akileraarnani nassiussisoqarsinnaasariaqartoq

- Momsip akileraartarnerullu peerneqarnissaannut tunngatillugu sivisuumik sulissuteqartariaqassasugut isumaqarpunga. Kalaallit Nunaat EU-mut tunngatillugu nunat qeqertallu imarpik ikaarlugu tikinneqarsinnaasutut nalunaarsugaanera isiginiarneqanngilaq, taamaattumillu Kalaallit Nunaata momsimik akiliiffiunnginnissaanut periarfissaqassagaluarpoq. Taamaallaat Danmarkimut tunngatillugu momsimik ajornartorsiuteqartoqartoq oqaluttuarfigineqarpunga.

- Siullermik suliffeqarfitsinnut pitsaanerpaamik atugaqarnissaq uannut pingaarnerpaavoq, kisianni soorunami aamma Danmarkimi ilaquttanut assersuutigalugu tunissutissanik nassiussisarnermut tunngatillugu. Nammineq pigisat suliallu pineqartillugit momsimut akiliinissaq naapertuutinngilaq, Aaja Chemnitz oqarpoq.

Kalaallit Nunaanni suliffeqarfik Danmarkimi inunnut ataasiakkaanut nassiussippat inatsisit imaapput:

Nioqqutip nalinga: Suut akilerneqassappat:

0 - 1.150 kr. Moms nioqqutissamillu eqqussinermut akitsuut

1.150 kr.-it sinnerlugit Moms nioqqutissamillu eqqussinermut akitsuut immaqalu aamma akitsuut

Najoqqutaq: Tusass

Kalaallit Nunaannit inuit ataasiakkaat Danmarkimi inunnut ataasiakkanut nassiussiniaraangata inatsisit imaapput:

Nioqqutip nalinga: Suut akilerneqassappat:

0–360 kr. Akitsuuteqarnatillu momseqanngillat

360–1.150 kr. Pisiap/tunissutip nalingata 25%-ia momsilerneqassaaq + eqqussinermut akitsuut

1.150 kr.-it sinnerlugit Pisiap/tunissutip nalingata 25%-ia momsilerneqassaaq + eqqussinermut akitsuut + akitsuut 2,5%-i.

Najoqqutaq: Tusass

PostNord Danmarkimi eqqussinermut akitsuusiussaq ullumikkut 160 kr.-iusoq, Tusass nittartakkamini aamma ilisimatitsivoq.

- Inuit ataasiakkaat Kalaallit Nunaanniit Danmarkimi nunaniluunniit allani inunnut nassiussisut poortukkap imaanik nalinganillu nalunaarutiginnittarnissaat pingaaruteqarpoq. Taamaanngippat poortukkap misissugassatut immikkoortinneqarnissaa ilimagineqarsinnaavoq, imaalu Toldmyndighedimit qanoq naleqarnerannik aalajangersaavigineqarsinnaallutik, Tusass allappoq.