Skattekort: Procentip akileraarutissaasup naatsorsorneqarnerani kukkusoqarsimasoq
Skattekortini arlalinni procentip akileraarutissaasup naatsorsorneqarnerani kukkuneqartoqartoq paasineqarpoq. Namminersorlutik Oqartussat aaqqiiniarlutik maanna suligasuarput, tusagassiutinut nalunaarummi allassimavoq.
2020-mut skattekortinik nassiussuinermut atatillugu innuttaasut arlallit procentip akileraarutissaasa naatsorsorneqarneranni kukkusoqarpoq. Tamanna innuttaasunut naak pineqartut pinngitsoornani soraarnerussutisianik katersinissamut pisussaaffimmik naammassinnissimagaluartut, procentip akileraarutissaasa qaffaavigineqarsimasunut tunngavoq, Namminersorlutik Oqartussat taama tusagassiutinut nalunaaruteqarput.
Ajornartorsiut ilaatigut soraarnerussutisiassanik katersanik sulisitsisunit aqunneqartunut tunngavoq, tassani ilaatigut akiliinerit pisimasarput, taamaattoq akiliutit Akileraartarnermut Aqutsisoqarfimmut nalunaarutigineqarsimanatik, ilaatigullu ajornartorsiut naalagaaffimmi tjenestemandinut Kalaallit Nunaanniittunut attuumassuteqarpoq, tamatumani pisuni arlalinni akissarsiat tjenestemandit ajunngitsorsiaattut nalunaarsorsimanatik, nassuiaatigineqarpoq.
Aamma qarasaasianik atortorissaarutini kukkunerit naammattoorneqarput, taamaalillutik innuttaasut uppernarsaatissanik eqqortunik nassiussisimagaluartut procentitut akileraarutissaat qaffanneqarsimalluni
- Atortorissaarutip nutaap atulersinneqarneranut atatillugu teknikikkut kukkuneq ajuusaarnartoq matumani pineqarpoq. Akisussaaffik soorunami uanniippoq – akisussaaffillu tamanna tamakkiisumik tiguara. Akileraartarnermut Aqutsisoqarfiup kukkuneq nassaariniarlugulu aaqqinniarlugu ulapputigaa – taamaalilluni innuttaasut eqqorneqartut sapinngisamik piaarnerpaamik skattekortimik nutaamik nassinneqarsinnaaqqullugit, aningaasaqarnermut naalakkersuisoq, Vittus Qujaukitsoq tusagassiutinut nalunaarummi oqarpoq.
Innuttaasut eqqunngitsumik procentimik akileraaruserneqarsimasut sapinngisamik piaarnerpaamik skattekortinik nutaanik nassinneqassasut, ilisimatitsissutigineqarpoq.