Skagenimi angutip kalaallip toqutaaneranut unnerluutigineqartut

Politiit aamma ambulancet januaarip 16-anni Skagenimi aqqusinermut Skagavejimut aggersarneqaramik amiilaarnartumik takusaqarput.

20-nik ukiulik Mik Thorstein Hansen inissiamini ilisarsaajunnaarluni baseballbatimik aamma ipittaatinik peqqarniisaarfigineqarsimavoq. Aammattaaq aamma qitigimigut savimmik tallimariarluni savimmik aamma qiuutinik kapineqarsimavoq.

Annaassiniartartut apuummata pineqartoq ilisimanngilaq. Taanna qulimiguulimmik Aalborg Universitetshospitalimukaanneqarpoq. Tassanilu ullut marluk qaangiummata aqqunartitersimanini toqqutigaa.

Politiit angut 28-nik ukiulik majuartarfeqarfinnik tigusaraat, taassuma inissiaq qimaleraluarpaa. Kingusinnerusukkut angutit sisamat tigusarineqarput, taakkulu tamarmik suliami toqutsisimasutut unnerluutigineqarput, eqqartuussineq ullumikkut Hjørringimi eqqartuussivimmi aallartinneqarpoq.

Persuttarneqarsimasup unnerluutigineqartut ilaannut 19-inik ukiulimmut ketamimik tunisisimanera persuttaanermut pissutaasoq, unnerluussisussaatitaasut isumaqarput.

Ketamin uumasut sinitsinneqarnerinut ilaatigut atorneqartarput.

19-inik ukiullip taanna iigamiuk, ingerlaannaq niui nikissinnaajunnaarput.

Unnerluussisussaatitaasut naapertorlugit tamanna pillaaniarnermik kinguneqarpoq. Taamaaliorneq 20-nik ukiullip toquneranik kinguneqartoq.

Unnerluutigineqartut ilaat, angut 42-nik ukiulik, unnerluutigineqartut pingasut unnuk taanna naapillugit oqaluttuarpoq.

Taakku ''kalaalipalaaq imerajuttoq'' pillarniarlugu oqaluuseraat, 19-inik ukiulimmut ketaminimik tunisisimanera pissutigalugu.

Angutit taakku pingasut 20-nik ukiullip inaanukarnerannik tamanna kinguneqarpoq.

42-nik ukiullip nassuiaanera naapertorlugu 20-nik ukiulik anusinngorsarniaraluarpaat.

42-nik ukiulik baseballbatimik nassarsimavoq, taassumalu persuttarneqartup niuinut atorpai.

Kisianni pisoq sakkortutsippoq, pinerloqataasullu marluk 42-nik ukiulik naapertorlugu sakkumik, ipittaammik nukkassaatit oqimaalutaannik peqqarniisaarput.

- Niaquata saarnga minnerpaamik ataasiarluni neeqquluppaluttoq tusaavara, unitsitseqqullunilu nilliavoq, taanna eqqartuussivimmi nassuiaavoq.

Tamatuma kingorna angutit pingasut inissiaq qimappaat, persuttarneqartorlu ikioriarfeerulluni nalasoq qimallugu.

Kinguninngua pinerloqataasut marluk 20-nik ukiullip inaanut uterput suliartik naammassiniarlugu utersimasut 42-nik ukiulik oqaluttuarpoq.

- Maanna toquvoq, taakku angutit marluk oqaatigisimasaat issuarpai.

42-nik ukiulik persuttaasimasutut nassuerpoq. Ilaat ataaseq persuttaanermut peqataasutut nassuerpoq, allallu marluk suliami pinngitsuunerarput.

Eqqartuusseqataasut arfinillit aamma eqqartuussisut pingasut unnerluutigineqartut pisuutippatigit, unnerluussisup Peter Raskip minnerpaamik ukiuni sisamani paarnaarussaanissaat piumasariniarpaa.

42-nik ukiulik killiligaanngitsumik eqqartuunneqarnissaa piumasarineqarpoq. Tamanna piffissaligaanngitsumik paarnaarussineruvoq, pinerluuteqartup avatangiisiminut immikkut ittumik ulorianaateqarneranik naliliisoqartillugu eqqartuussutigineqartartoq.

Eqqartuussiviup suliap ulluni arfine-pingasuni suliarineqarnissaanut piffissaliipput, januaarimilu eqqartuussuteqartoqarnissaa naatsorsuutigineqarpoq.

Miki Thorstein Hansenip arnaa kalaaliuvoq Skagenimi najugaqartoq.