- Sivisuumik Sundholmimiittoqassanngilaq – qasusoorutaasarpoq

Sussiep Sundholmimi Natcafé silataani kalaaleqatini allat nuannisaaqatigai. Tusarnaaruteerannguakkut kalaallisut nipilersuutinik tusarnaarput. Immiaaqqanik arfinilinnik peqarput. Sussieli sodavandip puuanik tigummiaqarpoq imaalu paasisassaanngilaq.

Imigassartorsimarpasinngilaq. Nipaa ersarippoq isaalu sunnertisimaneranik malunnaratik – oqaluttuarneralu ersarilluinnarpoq.

Sivikitsumik oqaloqatigereerlugu atia siulleq kisiat taassangutsigut naammagalugu tusagassiortoq takornartani oqaloqatigissallugu akuerivaa.

- Angerlarsimaffeqanngitsuuneq sakkortuvoq, ingammik ukiukkut, taanna eqimattamit ungasinnerulaartumit matup eqqannguanut inginnitta kinguninngua oqaluttuarpoq.

Sussie 40-nik ukioqarpoq. Taassuma ukiut arfineq-marluk matuma siorna uini Danmarkimut nooqatigisimavaa. Sussiellu meerai ilagalugit uiata najugaqarfianut Sønderborgimut nuussimapput.

- Kingorna avippugut uangalu angerlarsimaffeerullunga, tamaangalu Sundholmimut pivunga, taanna killitsisimanngilluinnarluni oqaluttuarpoq.

Ataatsimooqatigiinneq

Taassuma nassuiaatigaa, uikumi illoq pingimmagu sumiiffissaaruteriasaarsimalluni. Sussie ingerlaannaq Københavnimut nuuppoq. Oqarneratuummi: Sønderborgi nuannarinngilaa.

- Københavnimi najugaqarusunneruvunga, tamaanimi toqqissisimavunga. Kammalaatit qaniginerpaasakka ilaquttakkalu tamaani najugaqarput.

Sundholmi ilisarisimasaminit paasisimavaa.

- Kalaallit angerlarsimaffeqanngitsut tamaani najugallit ilisarisimavakka. Ineeqqamullu allatsissinnaasunga oqaluttuuppaannga.

Taanna Herbergscentretimi angerlarsimaffeqanngitsut piffissami aalajangersimasumi najugaqarfigisinnaasaanni ineeqqamik pissarsivoq. Sundholmimi kalaallit allat ataatsimooqatigalugit toqqissisimaffittaarpoq.

- Tamaaniittut tamaasa ilisarisimavakka.

- Ataatsimoortarpugut ikioqatigiittarlutalu. Suuteqanngikkuit allap tunissuaatit. Tassa tunniussassaqartillunga tunniussisarpunga. Immitsinnut paarivugut.

- Sillimasoqartuaannassaaq

Sundholmimilu ataatsimooqatigiinneq taamaallaat ajunngitsortaavoq. Ajortumimmi aamma pisoqartarpoq – ajorluinnartumik.

- Sivisuumik Sundholmimiittoqassanngilaq – qasusoorutaasarpormi.

- Assigiinngitsorpassuarnik pisoqartarpoq. Kikkut tamarmik imigassamik atornerluisuupput ilaallu aanngajaarniutinik ajornartorsiuteqarput, aanngajaarniutinillu suuteqanngikkaangamik kamassimaalertarput parruttoqartarlunilu. Tassa sissuertariaqarpoq.

- Sillimajuaannassaatit arlaannillu pisoqarsinnaanera eqqumaffigiuaannassallugu. Qanorlu oqaaseqarnissat mianersuutassaralugu.

Kammalaatini unnuineq

Naak taamaattoqaraluartoq Sussie suli tamaaniippoq – ukiunilu sisamani tamaaniissimalluni. Sundholmimilu ineeraqarunnaarsimavoq.

- Sulisut kamarujussuarfiginikuuakka. Ilaatigut qanoq innersugut paasisimaneq ajorpaat. Taamaammat kamarujussuarnikuuvunga tamannalu pissutigalugu Sundholmimi ineeqqamik pissarsisinnaajunnaarnikuuvunga. Taamaakkaluartoq tamaaniinginnarpunga, sumiiffimmi inuillu nalunngilakka.

Tassani oqaluttuarnini unitsillatsiarpaa. Isai immapput anniaatinilu oqaatingalugu.

- Kammalaateqarama unnuiffigisinnaasannik iluatsitsivimavunga, Sussie oqarpoq.

- Taarsisalernera nillertittalerneralu sakkortusarpoq, sumunnassanerlunga eqqarsaatigisarpara, naammi kammalaatikka – unnuisinnaanersunga aperilaarsinnaanngilaannga?

Pinngitsaalisaangajanneq

Angerlarsimaffeqanngitsut ornittagaat unnuiffigissallugu orniginartikkunnaarsimavaa.

- Ukioq kingulleq pinngitsaalisaangajannikuungama angerlarsimaffeqanngitsut ornittagaanni unnuinissara ornigijunnaarnikuuara.

- Angerlarsimaffeqanngitsutut pinngitsaalineqassanngikkaanni sumi imminut paarisoqarsinnaava?

- Naluara qanoq oqassanerlunga, Sussie sivikitsumik nipaallisimareerluni akivoq.

- Imminut paarisariaqarpoq. Ingammik ilisarisimanngisanut.

Sammisaq pillugu allaaserisat una toorlugu takukkit.