Siverth K. Heilmannip qaqagu suliartoqqissanersoq suli ilisimaneqanngilaq
Pinngortitamut avatangiisiullu naalakkersuisoq Siverth K. Heilmann inuummarlulluni napparsimaviliaanneqarpoq oktobarip 31-ani. Nuummi napparsimavimmi suli misissorneqarpoq
Siverth K. Heilmann suna peqqutigalugu inuummarlulersimanera suli nakorsanit paasineqanngilaq, taamaattumik qaqagu naalakkersuisutut suliartoqqissanersoq ilisimaneqanngilaq.
Atassutip siulittaasuata tullia Qulutannguaq Berthelsen Sermitsiaq.AG-mut ilisimatitsivoq.
- Atassutip ukiuni 40-nngortorsiornerani Siverth K. Heilmann kaffillertoqarnerani peqataavoq. Peqqissiartortoq takuneqarsinnaavoq, oqarpoq.
Inatsisartunut ilaasortaq Hermann Berthelsen (S) napparsimalluni aamma sulinngiffeqarpoq. Siffiamigut suliarineqarpoq oktobarimi.
- Maannamut suliaritinninniit qaammat qaangiuttoq malugisinnaavara pitsaaneruleriartornera ajunngitsumik ingerlasoq. Kisiannili nukiit allallu sungiusagassat malugisinnaavara pisariaqartoq suli piffissaqartariaqartoq ingerlatissallugit, Sermitsiaq.AG-mut oqarpoq.
Decembarip 31-ata tungaanut suliffeqarallarpoq suliaritinnikuunini pissutigalugu.
- Kisianni nukiit allallu sungiusagassat malugisinnaavara pisariaqartoq suli piffissaqartariaqartoq ingerlatissallugit. Taamatut suliaritinnerit annertuujummata allagartalerneqarpunga qaammatini pingasuni sulinngiffeqarnissaq periarfissaasoq. Kisiannili periarfissaqarpoq suli sivitsoqqilaarnissaanut. Taassuma kingorna nalunarumaanngilaq, Hermann Berthelsen oqarpoq.
- Soorunami uggornarpoq toqqaannartumik politikkikkut peqataannginnera. Kisianni ukiuni qulini siffialoreerlunga suliaritinnissara uannut pingaarnerpaajuvoq. Politikkimi suliaqarnermi pingaartuuvoq inuttut peqqinnissarput aamma siulliutissallugu. Qujanartumilli Siumumi sulinerput aaqqissuussaalluartuummut apeqqutini tamani isummersornissara periarfissaqarsimavoq. Nuannaarutigaaralu Siumup iluani tamanna annertuumik periarfissaqartinneqarsimammat. Suleqatikkalu tamaasa qutsavigaakka, Hermann Berthelsen oqarpoq.
Simon Simonsen napparsimalluni sulinngiffeqareerluni naalakkersuisutut tunuarniarluni aalajangerpoq ullumi sisamanngornermi.