Siverth K. Heilmann: Ataatsimeersuarnerup tulliani siulittaasutut tunuassaanga
Ukioq naatinnagu Atassummi siulittaasuujunnaarnissani Siverth K. Heilmannip naatsorsuutigaa
Siumup siulittaasua Kim Kielsen assigalugu Siverth K. Heilmann Atassummi siulittaasuuffik parteeqatiminut ingerlateqqinniarpaa.
Atassutip ataatsimeersuarnerani tulliuttumi siulittaasuujunnaassalluni Siverth K. Heilmannip ilisimatitsissutigaa.
- Partiimi siulersuisut qaammammi matumani ataatsimeereerpata paasinarsissaaq qaqagu ataatsimeersuartoqassanersoq. Inatsisartut ataatsimiinnerisa naammassinnginneranni imaluunniit ukiup naannginnerani tamanna pissasoq neriuutigaara, Sermitsiaq.AG-mut oqarpoq.
Taamaasilluni qaammatini tulliuttuni arfinilinni Atassutip nutaamik siulittaasunngornissaa naatsorsuutigineqartariaqarpoq.
- Partiimi siulittaasussatut kina innersuuppiuk?
- Innersuussassaqareerpunga, taamaattoq maanna oqaatigerusunngikkallarpara kina innersuunniarnerlugu. Atassutip siulersuisuini aamma ilaasortaajunnaarnissara naatsorsuutigaara, partiilli siulersuisuni ilaasortaanissara atorfissaqartissappagu tassani ilaasortaanissara ammaffigalugu, Siverth K. Heilmann oqarpoq.
Siverth K. Heilmann februaarimi 2017-mi Atassummi siulittaasunngorpoq.