Siverth K. Heilmann: Aqqalu tatigaara

Parteeqataasoq, pinngortitamut, avatangiisinut ilisimatusarnermullu Naalakkersuisoq, Siverth K. Heilmann erseqqissaavoq Aqqalu Jerimiassen Naalakkersuisutut sulilluartoq.

Inuussutissarsiornermut Nukissiuuteqarnermullu Naalakkersuisoq, Aqqalu Jerimiassen (A), silaannaap pissusia pillugu ilisimatuut silaannaap kissakkiartornera pillugu aningaasannanniartutut, inuillu silap pissusiata allanngoriartorneranut pisooqataassuseqanngissinnaaneranut oqarsimanini pillugu isornartorsiorneqangaatsiarpoq.

Sermitsiaq.AG-p avatangiisinut naalakkersuisoq, Aqqalu Jerimiassenillu partiiani siulittaasuusoq, Siverth K. Heilmann oqaatigineqartut pillugit isummeqqullugu piumaffigaa.

- Naqisimaneqarata isummersinnaatitaavugut, inuttut nammineq isummertoqarsinnaavoq aamma naalakkersuisutut isummertoqarsinnaavoq. Naalakkersuisutut isummerneq naalakkersuisutut inissisimanermi atuuppoq, aamma Aqqalu taama iliorpoq, Siverth K. Heilmann erseqqissaavoq.

Sulilluartoq

Taassuma qularinngilaa Aqqalu Jerimiassen Naalakkersuisutut sulilluartoq.

- Tulluusimaruutigalugu oqarsinnaavunga, Aqqalu Jerimiassen inuussutissarsiornermut nukissiuuteqarnermullu naalakkersuisutut, Naalakkersuisut anguniagaannik politikkiannillu anguniagaqarmat, Siverth K. Heilmann (A) Sermitsiaq.AG-mut oqarpoq.

Siverth K. Heilmann nammineerluni isumaqarpoq silaannaap kissakkiartorneranut inuit aamma pisooqataasut.

Taanna erseqqissaavoq maluginiarsimallugu Aqqalu Jerimiassen (A) nammineq inuttut isummaminik oqaaseqarsimasoq, namminerlu isummat naalakkersuisutut sulinermi sunniuteqarnavianngitsut.

- Inuk kinaagaluarpalluunniit isummerneri ataqqisassaapput. Politikki politikkiuvoq, Naalakkersuisullu anguniagassatut siunniussaat suliarivagut, Aqqalu Jerimiassen aamma taama oqarpoq, Siverth K. Heilmann oqarpoq.

Powered by Labrador CMS