stemmesluger
Siverth K. Heilmann: Qinersisartut nuannaarivaannga
Atassummi siulittaasoq, Siverth K. Heilmann, inuttut taaguunneqarnerpaani tulliuvoq, taamaallaat Asii Chemnitz Narupimit qaangerneqarpoq.
63-inik ukiulik Siverth K. Heilmann Maniitsumeersoq ukioq´manna februaarip ulluisa 19-anni Atassummi siulittaasunngortoq sapaatit akunneri arfiniliinnaat qaangiummata kommunimut qinersinermi taaguulluarneqartorujussuuvoq. Inuttut 596-inik taaguunneqarpoq, taamaallaat Kommuneqarfik Sermersuumi borgmesterimit, Asii Chemnitz Narupimit, inuttut 2.249-inik taaguunneqartumit qaangerneqarpoq.
- Taaguulluarneqartorujussuussallunga naatsorsuutigisimavara, taamaattumik angusat tupaallaatigivallaanngilakka. Qeqqata Kommuniani qinerisartut allannguisoqarnissaa kissaatigaat taamaattumik Atassut taaguulluarneqarsimavoq, ingammik Maniitsumi nunaqarfinnilu. Sisimiuni inuttut aamma taagorluarneqarsimavunga, tamannalu nuannaarutigisorujussuuara, Siverth K. Heilmann, oqarpoq.
Atuaruk: Maniitsumi Siverth K. Heilmann taaguunneqarluartoq
Partiimi siulittaasuuneq iluaqutaasoq
Inunnit nuannarineqarnini inuit inuttut nuannarimmanni aamma politikkut piginnaasai upperineqarmata taamarsuaq nuannarineqarluni isumaqarpoq.
- Inuppassuit nuannarigaannga nalunngilara aamma politikimi sorpassuarnik angusaqarsimanera nalunnginnamikku qinersisartuma tatigigaannga nalunngilara. Atassummi siulittaasunngornera aamma iluaqutigisimagunarapara taamaattumillu inuttut taagorneqarluarsimavunga, Siverth K. Heilmann, allakkatigut qinersereersimasoq taamaattorli ullormi qinersiviusumi illoqarfigisaminut Maniitsumut nammineq angallamminik avannamukarsimasoq oqarpoq.
Allaaserisaq tamaat aviisimi Sermitsiami atuaruk, taanna ullumi pisiniarfinni pisiarisinnaalerpat. Aviisi uani pisiarinissaanut aamma periarfissaqarputit: