naalakkersuisuni ajornartorsiorneq
Siverth K. Heilmann naalakkersuisunngulerunarpoq
Tusarfiit tutsuiginartut Sermitsiaq.AG-mut oqaatigaat naalakkersuisuni ilaasortanngortussaq Atassummiuussasoq
Maanna ilimanarsilluinnarpoq Naalakkersuisuni ilaasortanngortussaq tassaasoq Siverth K. Heilmann Atassummeersoq. Atassummut sinniisussaq Knud Kristiansen Upernavimmeersoq Inatsisartut ukiaanerani katersornerisa marlunngornermi nanginneqarnissaannut sulilluni aallartinissalereerpoq.
Tusarfiit tutsuiginartut Sermitsiaq.AG-mut oqaatigaat Knud Kristiansen sinniisussatut aggersarneqarsimasoq. Taanna Atassut sinnerlugu Inatsisartuni oqaaseqaatissamik allalluni aallartereersimasoq taamaasillunilu ilimanarluinnarpoq sinniisussasut marlunngornermi ivertinneqassasoq.
Akisussaaffiit allanngorsinnaapput
Tamatuma ilimanarsisippaa Siverth K. Heilmann naalakkersuisuni ilaasortanngussasoq. Sulili nalunarpoq naalakkersuisut oqartussaaffiinik allannguisoqassanersoq.
Inatsisartunut qinersinermi Steen Lynge Atassummi taaguunneqarnersaavoq 331-nit taaguunneqarluni tullliuvorlu Siverth K. Heilmann 293-nik taaguunneqartoq.
Steen Lynge naalakkersuisuni ilaasortanngorami Inatsisarsuni sulinngiffeqarnissamik qinnuteqarpoq taamaasillunilu partiip siulittaasua Gerhardt Petersen Inatsisartuni ilaasortanngorpoq.
Knud Kristiansen sinniisussamut tulliuvoq 190-nit taaguunneqarsimalluni. Sinniisussat pingajoraat Mala Høy Kuko Tasiilameersoq qinersinermi 188-nit taaguunneqartoq.
60-nik ukiulik Siverth K. Heilmann siornatigut naalakkersuisuni ilaasortaareersimavoq inuussutissarsiornermut, sulisoqarnermut inuussutissarsiutitigullu ilinniartitaanermut naalakkersuisuusimagami. Siverth K. Heilmann Inatsisartunit sulinngiffeqarnerup saniatigut Qeqqata Kommuniani kommunalbestyrelsemit sulinngiffeqartussaassaaq.